Bas múftı belgili ǵalymmen ortaq jobany talqylady (FOTO)
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Almaty qalasyna jasaǵan jumys sapary barysynda Fılosofııa, saıasattaný jáne dintaný ınstıtýty Dintaný ortalyǵynyń dırektory, fılosofııa ǵylymdarynyń doktory, professor Baqytjan Satershınovpen kezdesti.
Kezdesýde Keńes dáýiri tusynda saıası qýǵynǵa ushyraǵan din qaıratkerlerin anyqtap, olardy aqtaýǵa úles qosý maqsatynda ótetin konferetsııa barysy talqylandy.
Bas múftı saıası qýǵyn-súrginge ushyraǵan halqyna qaltqysyz qyzmet etken ult qaımaqtary arasynda moldalar, ahýndar, ıshandar, jalpy din qaıratkerleri bolǵanyn aıta kele, jazyqsyz ólim jazasyna kesilip, áli kúnge deıin aqtalmaǵan din qaıratkerleriniń muralaryn jańǵyrtyp, esimderin elge tanytý bizdiń mindet ekenin basa aıtty.
Saıası qýǵyn-súrgin qurbandaryn tolyq aqtaý jónindegi Memlekettik komıssııanyń Dástúrli din ókilderin aqtaý jónindegi jumys tobynyń jetekshisi Baqytjan Satershınov konferetsııa barysynda Keńes zamanyndaǵy dástúrli din ókilderine qarsy saıası qýǵyn-súrgin kórsetýdiń erekshelikteri, qýǵynǵa ushyraǵan din ókilderin anyqtaýǵa qatysty ǵylymı aınalymǵa enbegen arhıvtik málimetter men aýyzsha derekterdi taldaý, dástúrli konfessııalardyń aqtalmaǵan ókilderiniń derbes derekter bazasyn qalyptastyrý boıynsha usynystar ázirleý kerektigin alǵa tartty.
Kezdesý sońynda Naýryzbaı qajy Taǵanuly Baqytjan Satershınovke bıyl «Múftııat» baspasynan jaryq kórgen «Ihsan – rýhanı tárbıe negizi» kitabyn syıǵa tartty.
