Bas múftı Damır Mýhetdınovty qabyldady (FOTO)
Elordada Bas múftı Naýryzbaı qajy Taǵanuly Reseı Federatsııasy musylmandary dinı basqarmasy tóraǵasynyń birinshi orynbasary Damır Mýhetdınovty qabyldady.
Kezdesýde Qazaqstan jáne Reseı musylmandary dinı basqarmalary arasyndaǵy oqý-aǵartý, baspa, ýaǵyz-nasıhat t.b salalar boıynsha áriptestik baılanysty nyǵaıtý máselesi sóz boldy.
«Qazaqstan men Reseı musylmandary dinı basqarmalary arasyndaǵy baýyrlastyq baılanys kún sanap artyp keledi. Ózińiz jaqsy bilesiz, bizdiń ımamdar Máskeý qalasynda biliktilikti arttyrý kýrsyna qatysty. Igi is-sharalarymyzǵa qatysyp, bastamalarymyzǵa qoldaý kórsetip kele jatqan Reseı Federatsııasy musylmandary dinı basqarmasy jáne Reseı múftıler keńesiniń tóraǵasy, sheıh Ravıl Gaınýtdınge alǵysymdy bildiremin. Alla razy bolsyn!» – dedi QMDB Tóraǵasy Naýryzbaı qajy Taǵanuly.
Óz kezeginde sóz alǵan Damır Mýhetdınov: «Qurmetti Naýryzbaı qajy Taǵanuly! Ózińiz basqaratyn Qazaqstan musylmandary dinı basqarmasynyń jumysy ýaqyt ótken saıyn jandanyp keledi. Siz bizdiń halyqaralyq deńgeıdegi ıgi is-sharalarymyzǵa belsendi túrde qatysyp kelesiz. Biz muny árqashan joǵary baǵalaımyz ári rızashylyq nıetimizdi jetkizemiz», – dedi.
Kezdesýde ekijaqty yntymaqtastyqty damytý jaıy sóz bolyp, ımamdardy oqytý, din qyzmetkerleriniń biliktiligin kóterý, ózara tájirıbe almasý, baspa salasy boıynsha ortaq jobalardy júzege asyrý máseleleri talqylandy.
