Bas múftı depýtatpen birqatar máseleni talqylady (FOTO)
Elordada Qazaqstan musylmandary dinı basqarmasynyń tóraǵasy Naýryzbaı qajy Taǵanuly Qazaqstan halqy Assambleıasy atynan saılanǵan Májilis depýtaty Ilııas Júsipulymen kezdesti.
Basqosýda ultaralyq tatýlyqty nyǵaıtýdyń mańyzy, din qyzmetkerleriniń bilimin kóterý, jastardy din men dástúr qundylyqtary aıasynda tárbıeleý, táýelsizdiktiń 30 jyldyq mereıtoıy aıasynda ıgi is-sharalardy júzege asyrý, t.b. máseleler talqylandy.
Bas múftı elimizdegi musylman jamaǵatynyń Ábý Hanıfa mázhabyn ustanýy dinı tutastyq pen birlikti nyǵaıtýǵa oń yqpal etip kele jatqanyna aıryqsha toqtalyp ótti.
Sondaı-aq, Naýryzbaı qajy Taǵanuly Dinı basqarma Jambyl oblysy Qordaı aýdanyndaǵy dinı ahýalǵa aıryqsha nazar aýdaryp otyrǵanyn, jergilikti jamaǵat arasynda aqparattyq-túsindirme jáne ýaǵyz-nasıhat jumystary qasıetti Ramazan aıynda da jalǵasa beretinin jetkizdi.
«Birlik pen beıbitshilik – basty qundylyǵymyz. Ony qasterlep, qadirine jetý jáne baıandy ete túsý – ár azamattyń Otan aldyndaǵy ortaq boryshy bolýy tıis. Biz osy baǵytta birlese jumys istesek, isimiz nátıjeli bolady dep esepteımin» dedi Bas múftı Naýryzbaı qajy Taǵanuly.
Kezdesý sońynda taraptar birlesken ortaq ıgi jobalardy júzege asyrýǵa ýaǵdalasty.
