Bas múftı eriktilerdi merekemen quttyqtady
Senim máselesi – barsha adamnyń asyl qazynasy. Abaı atamyzdyń «Kókirekte sáýle joq, kóńilde senim joq. Qur kózbenen kórgen bizdiń haıýan maldan nemiz artyq?» deıtini bar. Adamnyń basqa jaratylystardan aıyrmashylyǵy osynda – kókirek kózi men kóńil seniminiń bolýynda.
Adamdardyń bir birine degen senimi kúsheıgen saıyn myna ómir de gúl jaınaıdy. Senimdi kúsheıtýdiń bir joly – meıirimdi bolý, qamqorlyq tanytý. Bıylǵy pandemııa kezinde bul aıqyn kórindi. Qaıyrymdy jomart jandar men meıirimdi eriktiler muqtaj otbasylardan kómegin aıaǵan joq. Osyndaı shynaıy janashyrlyǵymyz bizdiń bereke-birligimizdi arttyra tústi.
Múftııattyń, meshitterimizdiń eriktileri kóptegen qaıyrymdylyq sharalardyń bel ortasynan tabyldy. Eldi juqpaly aýrý jaılaǵanyna qaramastan, pandemııa kezinde eriktiler janyn shúberekke túıe otyryp, muqtaj jandardyń otbasylaryna qajetti zattardy jetkizip berdi. Qurban aıt kezinde de eriktilerdiń eńbegin el kórdi.
Osyndaı syn saǵatta saýapty isterge atsalysyp, jaqsylyqtyń janynan tabyla bilgen meshit ımamdaryna, ımamdardyń ıgi isine qolǵabys etken barsha eriktilerge ózimniń jáne Qazaqstan musylmandary dinı basqarmasy atynan alǵys aıtamyn. Jaratýshy Iem olardyń atqarǵan ár isin, basqan ár izin saýaptan jazǵaı. Alla Taǵala osyndaı janashyrlyǵymyz ben bereke-birligimizdi arttyra túskeı!
Qurmetpen, QMDB Tóraǵasy, Bas múftı Naýryzbaı qajy Taǵanuly
