Bas múftı Esik qalasynda dinı saýat ashý ortalyǵynyń ashylýyna qatysty (FOTO)
Bas múftı Naýryzbaı qajy Taǵanuly Almaty oblysy, Esik qalasynda qyzdarǵa arnalǵan dinı saýat ashý ortalyǵynyń ashylý saltanatyna qatysty. Igi is-sharaǵa Rátbek qajy Nysanbaıuly, Erjan qajy Malǵajyuly, Eńbekshiqazaq aýdan ákiminiń orynbasary Dosymbaı Altaı jáne jamaǵat qatysty.
Saltanatty is-sharada Bas múftı Naýryzbaı qajy Taǵanuly: «Qazaqstan musylmandary dinı basqarmasynyń qoǵam aldyndaǵy mindetteriniń biri – halyqtyń dinı saýatyn ashý. Búginde respýblıka boıynsha 900 meshitte dinı saýat ashý kýrsy jumys isteıdi. Budan bólek jastardy ımandylyq pen patrıotızmge tárbıeleıtin 20 qaıyrymdylyq mekemesi bar. 6 Quran jattaý ortalyǵy ashyldy. 2020 jyly saýat ashý kýrsynda 29 800 adam Islam negizderin úırendi.
2021 jyly alǵashqy 4 aıda 12 900 adam meshit janyndaǵy dinı saýat ashý kýrsynan tálim aldy. Allaǵa shúkir, búgin elimizde taǵy bir saýat ashý kýrsy ashyldy. Alla Taǵala osy ortalyqtan bilimdi azamattar shyǵýyn násip etkeı» dedi.
Esik qalasynyń ortalyq meshiti janynan boı kótergen saýat ashý ortalyǵy jergilikti kásipker azamattar men «Keń bolaıyq» qaıyrymdylyq qorynyń demeýshiligimen turǵyzyldy. 60-tan astam qyz balaǵa arnalǵan ǵımarattaǵy dárishanalar zamanaýı úlgide kompıýterlermen jabdyqtaldy. Dáristen tys ismer qyzdar úshin tigin mashınalar da qarastyrylǵan. Ashana men sport zaly da bar.
Naýryzbaı qajy Taǵanuly saýat ashý ortalyǵyna smart teledıdardy syıǵa berip, aýdan ımamy Saparhan Aıdarhanulyn alǵys hatpen marapattady. Jıylǵan jamaǵat aldynda sóz alǵan Rátbek qajy Nysanbaıuly saýapty iske uıytqy bolǵan demeýshilerge alǵys aıtyp, batasyn berdi.
