Bas múftı ǵylymı-tanymdyq konferentsııaǵa qatysty (FOTO)
Búgin Qyzylordada oblystyq ókildiktiń uıymdastyrýymen ǵylymı-tanymdyq konferentsııa ótti. «Syr eli ahýn-ıshandarynyń dinı aǵartýshylyq qyzmeti» taqyrybynda ótken sharaǵa Bas múftı Naýryzbaı qajy Taǵanuly qatysty.
Alǵash sóz alǵan QMDB Tóraǵasy talaı teperish kórse de, din nasıhatyna adal bolǵan ıshandardyń eńbegine erekshe toqtaldy.
«Syr óńiri – asyl dinimizdiń alty alashqa taralý jolynda kóp eńbek sińirgen ólke. Bul ólkeden bizge málim dúldúl aqyndar, batyrlar, bıler ǵana emes, ahýndar men ıshandar, molda men maqsym atanǵan oqymysty, ǵulamalar shyqty. Saıasat, óner, bilim, ǵylym salasynda bıik deńgeıden kóringen Syr perzentteriniń Orta Azııa ǵana emes, búkil Shyǵys mádenıetinde alar orny berik. Olardyń qatarynda qazaqtyń óz aldyna derbes el retinde qurylýyna, mádenıetin damytýǵa úlken eńbek sińirgen memleket jáne qoǵam qaıratkerleri, aǵartýshy kúreskerler bar.
Qazaq dalasynda aǵartýshylyq isti ıshandar men ahýndar óristetti. Olar el ómirindegi yqpaldy áleýmettik top retinde halyqty Islam dininiń basty ustanymy – ımandylyqqa tárbıelep, meshit saldyryp, medrese ashyp, Shyǵystyń klassıkalyq ádebı muralaryn nasıhattap, dinı tálim-tárbıe, oqý-aǵartý isteri arqyly shyn mánindegi kúreskerge aınaldy. Syr óńirinde meshit-medrese ashqan aǵartýshy-ustazdar kóp. Halyqqa rýhanı tárbıe berý, saýyqtyrý ári jas urpaqty saýattandyrý salasynda rııasyz qyzmet atqarǵan sondaı aǵartýshylardyń eńbegi baıypty zertteýdi qajet etedi», – dedi Naýryzbaı qajy Taǵanuly.
Sonymen qatar konferentsııa barysynda professor Qazybaı Qudaıbergenov, Nur-Múbarak ýnıversıtetiniń prorektory Qaırat Qurmanbaev, tarıh ǵylymdarynyń kandıdaty Myńjas Káribozuly syndy Syr boıynyń zertteýshi-ǵalymdary sóz alyp, din jolynda eńbek etken ahýn-ıshandar ómirinen tyń derekter aıtty.
