Bas múftı IH Respýblıkalyq qarılar baıqaýynyń marapattaý rásimine qatysty (FOTO)

Elordadaǵy «Áziret Sultan» meshitinde Qazaqstan musylmandary dinı basqarmasynyń uıymdastyrýymen Quran Kárimdi jatqa jáne mánerlep oqýdan IH respýblıkalyq baıqaýy máresine jetti. 

72 úmitker baq synaǵan baıqaýdyń jeńimpazdary men júldegelerin marapattaý rásimine QMDB tóraǵasy, Bas múftı Naýryzbaı qajy Taǵanuly, el aǵalary, ult zııalylary Ómirzaq Ozǵanbaev pen Myrzataı Joldasbek, sondaı-aq, din janashyry, jarysqa demeýshilik jasaǵan Bahardın Ablıazımov arnaıy qatysty.

«Allaǵa sansyz shúkirler bolsyn, jasynan Quran jattap qarılardyń baıqaýyn qorytyndylap, marapattap otyrmyz. Qazirgi pandemııaǵa qaramastan, altyn ýaqyttaryn bólip kelgen el aǵalary Ómirzaq Ozǵanbaev, Myrzataı Joldasbek, Ǵarıfolla Esim aǵalarymyzǵa jáne osy baıqaýdy ótkizýge atsalysqan QMDB ujymy men Nur-Sultan qalasynyń ókildigine, qarılardy bastap kelgen oblystardyń bas ımamdary men demeýshi bolǵan azamattarǵa alǵysymdy bildiremin.

Qatysýshylardyń qarym-qabiletin baǵalap, jarysqa tórelik etken qazylar alqasyndaǵy Kámiljan, Sádýaqas, Erkinbek, Ersin jáne Jumanazar qarılarǵa da raqmetimdi aıtyp, Alla jar bolsyn demekpin. Osy otyrǵan jap-jas qarılarymyz ózderińiz sekildi bilimdi, abyroıly azamat bolyp óssin!» - dedi Bas múftı marapattaý sátinde.

Qazylar alqasynyń sheshimimen 4 atalym boıynsha jeńis tuǵyrynan kóringen qarılardyń tizimi tómendegideı:

«Mánerlep oqý» boıynsha:

I oryn (500 000 teńge) – Rapıh Farýh (Taldyqorǵan, 27 jasta)

II oryn (300 000 teńge ) – Sabyrdjan Muhammed Aıpjanuly (Qaraǵandy, 21 jasta)

III oryn (150 000 teńge) – Rysbek Ádilet Salaýatkereıuly (Shymkent, 19 jasta)      

«10 para» boıynsha:        

I oryn (1 000 000 teńge) – Abdılazız Abdýlbaqı Savronbekuly (Jambyl oblysy, 9 jasta)      

II oryn (750 000 teńge) – Igilik Islamnýrı Serjanuly (Shymkent, 13 jasta)

III oryn (500 000 teńge) – Yǵylman Muhammed Vladımıruly (22 jasta)

«20 para» boıynsha: 

I oryn (1 500 000 teńge) – Keneshbaı Qýanysh Nurlanuly (Almaty qalasy, 14 jasta) 

II oryn (1 250 000 teńge) – Seıtqasym Erqanat Serikuly (Nur-Sultan, 11 jasta) 

III oryn (1 000 000 teńge) – Tasbolatov Bekzat Dýlatuly (Aqtóbe, 17 jasta)

«30 para» boıynsha: 

Bas júlde (avtokólik) – Týrsýnov Abdýlgoffar Mahmýdjan (SQO, 29 jasta)

II oryn (2 000 000 teńge) – Myrzageldi Imanáli Beıbituly (Shymkent, 17 jasta)

III oryn (1 500 000 teńge) – Abıshev Qýanysh Toqsanbaıuly (Qyzylorda, 30 jasta). 

Sondaı-aq, jarystyń eń jas qatysýshysy, 8 jastaǵy mektep oqýshysy Seıtqasym Nurtileý Serikulyna «Kórermen kózaıymy» nomınatsııasy boıynsha ata-anasymen birge kishi qajylyqqa joldama berildi. Al qalǵan qatysýshylarǵa 50 000 teńgeden yntalandyrý syılyǵy tabystaldy.

Jeńimpazdarmen birge baıqaýǵa qazylyq jasaǵan elimizge belgili qarılar Kámiljan Iýldashuly (tóraǵa), Sádýaqas Oljabaı, Erkinbek Shoqaı, Ersin Ámire men Jumanazar Sadyrhanovqa Bas múftı arnaıy alǵys bildirip, marapattady. 

Eske sala keteıik, eki kúnge sozylǵan qarılar baıqaýy Dinı basqarmanyń 30 jyldyǵyna oraı uıymdastyryldy. Eldegi pandemııaǵa baılanysty baıqaý eki kún boıy «Hıkmet stýdııasynyń» YouTube-arnasynan, «Halyq Arna» telearnasy jáne Múftııattyń Instagram-daǵy resmı paraqshasynan tikeleı Efırde kórsetildi. 

Alla Taǵala jas kúnin Quran jattaýmen ótkizgen qarılarymyzǵa bir ózi jar bolyp, izbasarlaryn kóp qylsyn!