Bas múftı «Imamdar úıiniń» ashylýyna qatysty (FOTO)
Jambyl oblysyndaǵy jumys sapary aıasynda Bas múftı Naýryzbaı qajy Taǵanuly Qordaı aýdanynda boı kótergen «Imamdar úıiniń» ashylýyna qatysty.
«Imamdar úıinde» ońaltý jáne aldyn alý, qazaq tili, beıbitshilik jáne kelisim ortalyqtary, sonymen qatar dárishana men kitaphana bar. Jambyl oblysynyń bas ımamy Beıbit Myrzageldıevtiń aıtýynsha, munda jergilikti dúngen ımamdarǵa qazaq tilinen sabaq beriledi. Dáris synyptarynan bólek 40 adamǵa arnalǵan jatyn orny men májilis zaly bar. Kitaphanadaǵy kitap qory da jetkilikti.
QMDB Tóraǵasy saltanatty shara barysynda aýdan ákimimen birge «Imamdar úıiniń» lentasyn qıyp, nysandy aralap kórdi. «Jyl basynda osy óńirge arnaıy keldim. Osy aralyqta kóptegen jumystar atqaryldy. Mine, sonyń nátıjesi. Allaǵa shúkir, búgin qýanyshty kún. Bul ortalyqta ımamdar dáris alýmen qatar, memlekettik tildi meńgeredi. Ońaltý bólimi de bar. Jańa nysan eldiń ıgiligine, birligine qyzmet ete bersin», – dedi Naýryzbaı qajy Taǵanuly.
Jıynda sóz alǵan jergilikti aýdan turǵyny Dinlosar Shysyr aqsaqal osy iske uıytqy bolǵan azamattarǵa, Bas múftıge rızashylyq bildirdi.
