Bas múftı Iran elshisiniń keńesshisin qabyldady (FOTO)
Búgin elordada Bas múftı Naýryzbaı qajy Taǵanuly Iran Islam Respýblıkasynyń elimizdegi elshisiniń mádenı ister jónindegi keńesshisi Álı Akbar Talebı Matın myrzany qabyldady.
Kezdesýde Álı Akbar Talebı Matın Qazaqstanda ár úsh jyl saıyn ótetin Álemdik jáne dástúrli din lıderleri seziniń órkenıetaralyq dıalogty damytýǵa qosqan úlesin, dinder arasyndaǵy dostyq pen ózara kelisimdi nyǵaıtýdaǵy rólin aıryqsha atap ótip, jyly pikiri men izgi nıetin jetkizdi. Sonymen qatar Iranda jyl saıyn ótetin mázhabtardy jaqyndastyrý kongresiniń jumysyna toqtaldy.
Basqosýda Bas múftı men elshi keńesshisi ǵylymı jobalardy júzege asyrý, Islam qundylyqtary týraly kitap shyǵarý, bilim men ǵylym salasynda ortaq is-sharalardy birlese atqarý syndy birqatar máseleler tóńireginde pikir almasty.
Álı Akbar Talebı Matın Bas múftı Naýryzbaı qajy Taǵanulyn aldaǵy ýaqytta Iranda ótetin mázhabtardy jaqyndastyrý kongresi men halyqaralyq Quran jarysynyń mártebeli meımany bolýǵa shaqyrdy.
