Bas múftı halyqaralyq fotokórmeniń ashylýyna qatysty (FOTO)
QMDB Tóraǵasy, Bas múftı Naýryzbaı qajy Taǵanuly elordadaǵy Ulttyq mýzeı men Konfessııaaralyq jáne órkenıetaralyq dıalogty damytýdyń N.Nazarbaev ortalyǵy uıymdastyrǵan «ISLAM: KEShE, BÚGIN, ERTEŃ» fotokórmesine qurmetti qonaq retinde shaqyryldy.
Atalǵan fotokórme elorda kúnine oraılastyrylǵan. Fotokórmeni ótkizýdegi maqsat – tolerantty dúnıetanym men ıslamǵa degen qurmetti qalyptastyrý, ıslam dini beıbitshilik pen tynyshtyqtyń dini ekendigin kórsetý, qoǵamdaǵy tózimdilikti, beıbitshilik, kelisim ıdeıalaryn nasıhattaý, halyqaralyq qoǵamdastyqtaǵy yntymaqtastyq, Otanǵa degen qurmet pen tarıhqa mán berý.
«Qazaqta «Otandy súıý – ımannan» degen qanatty sóz bar. Asyl dinimiz otandy súıýdi, el-jurtqa qyzmet etýdi árqashan dáriptep keledi. Eńseli elordamyz Nur-Sultan qalasy – Otanymyzdyń júregi ispetti. Táýelsizdiktiń tuǵyrly bolýyna elordamyzdyń da eseli úlesi bar. Sondyqtan alda kele jatqan elorda kúni biz úshin mereı, mereke.
Fotokórmeniń elorda kúnine oraılasyp uıymdastyrylýy da beker emes dep oılaımyn. Sebebi sáýletti meshitterimizdiń boı kóterýi, basqa da asyl dinimizdiń abyroıyn eseleıtin mańyzdy sheshimderdiń bári osy elordada qabyldandy. Musylmandardyń qasterli merekesi Qurban aıt meıirimdilik pen birliktiń merekesine aınaldy» dedi Bas múftı kórmeniń ashylý saltanaty kezinde.
Naýryzbaı qajy Taǵanuly qonaqtarmen birge Islam álemine qatysty kórmeni aralap shyqty. Munda túrli janrdaǵy sýretter qoıylǵan. Onyń ishinde azan aıtý, neke qııý rásimi, qaıyrymdylyq sharasy, Qurban aıt, namaz oqý syndy sátti kadrlar tańdap alynǵan.
Islam álemine qatysty kórmeni elordadaǵy Ulttyq mýzeıden tamashalaı alasyz.
