Bas múftı halyqaralyq konferentsııada baıandama jasady (FOTO)
Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly Almatyda táýelsizdigimizdiń 30 jyldyq, Nur-Múbarak Egıpet ıslam mádenıeti ýnıversıtetiniń 20 jyldyq mereıtoıyna arnalǵan «Ulttyq rýhanı tutastyqty damytýdaǵy dinı bilim berýdiń mańyzy» atty halyqaralyq ǵylymı-tájirıbelik konferentsııaǵa qatysyp, baıandama jasady.
«Allaǵa shúkir, memleketimizdiń qamqorlyǵymen Nur-Múbarak ýnıversıtetine jyl saıyn 200-ge jýyq bilim granty bólinedi. Búgingi kúnge deıin irgeli dinı oqý ornyn 2059 shákirt bitirip, meshitter men medreselerde, jergilikti ákimdikterde, elshilikterde, ǵylymı zertteý ortalyqtarynda, joǵary oqý oryndarynda elimizdiń ıgiligi men birligi jolynda qyzmet etýde.
2012 jyly ýnıversıtet janynan doktorantýra bólimi ashyldy. Búginde doktorlarymyz ǵylymı jobalarmen aınalysýda. Biz ýnıversıtet janynan ǵylymı zertteý ortalyǵyn, radıkaldy dinı aǵymdaǵy azamattarǵa túsindirme jumystaryn júrgizetin ımamdardy oqytý kýrsyn ashtyq.
Saıyp kelgende, ýnıversıtet qyzmetin jandandyryp, jetildirip otyrý – bizdiń basty nazarymyzda. Biz jýyrda Mysyr Arab Respýblıkasyna jasaǵan saparymyzda ál-Ázhar sheıhy, Bas ımam, mártebeli Ahmet Taıyppen, Ýaqyp mınıstri Muhammed Muhtar Jumamen kezdesip, ýnıversıtet jumysyn jańa deńgeıge kóterý týraly ýaǵdalastyqqa qol jetkizdik.
Kaırde ótken kezdesýde ál-Azhar sheıhyna Qazaqstanǵa bólinetin bilim granty sanyn eki ese kóbeıtýdi usyndym. Sonymen qatar Qazaqstanda salynatyn Islam akademııasyn, Islam jáne teologııa kitaphanasyn klassıkalyq dinı kitaptarmen qamtamasyz etýdiń mańyzdylyǵyn baıandadym.
Ál-Azhar ýnıversıtetiniń sheıhy bul usynysty qoldaıtynyn, Qazaqstan úshin bólinetin bilim granty eki ese ulǵaıatynyn málimdedi. Sonymen qatar Islam akademııasy men Islam jáne teologııa kitaphanasyna qajetti klassıkalyq baǵyttaǵy kitaptardy jetkizip berýge ýáde etti.
Qazaqstan musylmandary dinı basqarmasy men ál-Azhar ýnıversıteti arasynda jasalǵan kelisim boıynsha jyl saıyn qazaqstandyq ımamdar úshin 25 bilim granty bólinetin. Endi jyl saıyn 50 ımam ál-Azhar ýnıversıtetinde bilimin jetildiredi» dedi Bas múftı Naýryzbaı qajy Taǵanuly.
Konferentsııa jumysyna Aqparat jáne qoǵamdyq damý mınıstrliginiń, Mysyr Arab Respýblıkasy Ýaqyptar mınıstrliginiń ókilderi, álemge áıgili ál-Azhar ýnıversıtetiniń ustazdary, AQSh, Mysyr, Túrkııa, Reseı, Ózbekstan, Qyrǵyzstan elderiniń din salasynyń ǵalymdary qatysýda.
Halyqaralyq basqosýda ǵalymdar jahandyq jáne aımaqtyq syn-qaterler, dinı bilim berýdiń mańyzy, qazaqstandyq ıslamtaný mektebiniń qalyptasýy jáne ony júzege asyrý, qazirgi dintanýlyq bilim berý baǵyty, t.b. máselelerdi talqylaýda.
