Bas múftı halyqaralyq konferentsııada baıandama jasady (FOTO)
Búgin Túrkistan oblysy Saryaǵash aýdanynda bastalǵan Ábdisattar, Ábdiǵappar Shákiruldarynyń rýhyna arnalǵan «Din rýhanııatynyń ulaǵatty ustazdary» halyqaralyq ǵylymı-tanymdyq konferentsııasynda QMDB Tóraǵasy, Bas múftı Naýryzbaı qajy Taǵanuly baıandama jasap, din ǵulamalarynyń maǵynaly ǵumyryna toqtaldy.
«Dástúrimizben bite qaınasatyn musylmandyq sıpat sóz bolǵanda ońtústik ólke nazardan tys qalmaıdy. Qazaqtyń baıtaq dalasy, onyń ishinde Saryaǵash jurtyna aty máshhúr qos birdeı din janashyry Ábdisattar, Ábdiǵappar Shákiruldary týraly kóp aıtýǵa bolady. Elimizdegi dinı bilim beretin medreseler týraly aıtylǵanda alǵash «Saryaǵash medresesi» eske túsedi. Al «Saryaǵash medresesi» týraly aıtylǵanda Smanovtar áýleti alda turady. Osy medresege Ábdisattar aǵamyz ózi basshylyq etip, kelgen jastardyń dinı saýatyn ashyp qana qoımaı, olardy maman etip daıyndaýǵa kúsh saldy.
Paıǵambarymyz Muhammed (oǵan Allanyń salaýaty men sálemi bolsyn): «Senderdiń eń jaqsylaryń – Qurandy úırenip ony úıretkenderiń» degen ósıetine amal etti. Sonymen qatar Ábdisattar Smanov qasıetti Quran Kárimniń qazaq tilindegi aýdarmasyn jasap, birqatar ǵylymı eńbekterdiń avtory atandy. Qazirgi tańda úlken bir pármendi ınstıtýtqa aınalǵan Ǵulamalar keńesiniń qurylǵan jyldarynda múshe bop, alǵashqy pátýalardy qabyldaýda ǵalym retinde úlesin qosty. Jyldar boıy medrese qabyrǵasynda kóptegen shákirt tárbıeledi», – deı kele Bas múftı Naýryzbaı qajy Taǵanuly alqaly jıynǵa arqaý bolǵan ulaǵatty ustazdardyń din men rýhanııat jolynda atqarǵan eńbegine erekshe toqtaldy.
Sondaı-aq 90-jyldardyń basynan «Taıaqty Ishan» meshitinde bas ımam bolyp qyzmetin bastaǵan Ábdiǵappar Shákirulynyń shákirt tárbıeleýdegi ustazdyq qyzmeti jaıynda aıtyp ótip. «Saryaǵash» medresesin damytý, basshylyq jumystary men maǵynaly nasıhaty kóptiń kókeıinde, halyqtyń jadynda qalatyny anyq dedi Bas múftı.
Aıta keteıik, búgingi alqaly jıynǵa Ózbekstan musylmandary dinı basqarmasynyń tóraǵasy Ýsmanhan Alımov, Qyrǵyzstan múftıiniń mindetin atqarýshy Joroboı qajy Sherǵazyev, QMDB Tóraǵasynyń orynbasary, naıb múftı Ershat Aǵybaıuly, Apparat basshysy Ǵylymbek Jádigeruly, QMDB Ǵulamalar keńesiniń músheleri, Nur-Múbarak ýnıversıtetiniń ustazdary, oblys bas ımamdary men medrese dırektorlary qatysýda.
