Bas múftı Halyqaralyq konferentsııaǵa qatysty (FOTO)
QMDB Tóraǵasy, Bas múftı Naýryzbaı qajy Taǵanuly Qazaqstan musylmandary dinı basqarmasy jáne Nur-Múbarak ýnıversıtetiniń uıymdastyrýymen el Táýelsizdiginiń 30 jyldyǵyna oraı ótken «Qazaqstan – dinaralyq tatýlyq besigi» atty halyqaralyq ǵylymı-tájirıbelik konferentsııaǵa qatysty.
Naýryzbaı qajy Taǵanuly konferentsııaǵa qatysýshylardy Táýelsizdiktiń 30 jyldyǵymen quttyqtaı kele, egemen el bolý árbir ulttyń mańdaıyna buıyra bermeıtin baq ekenin atap ótti.
Bas múftı óz sózinde Islamnyń barlyq zamanǵa jaýap beretin adamzat pen jyndarǵa jiberilgen sońǵy ıláhı din ekenin, jaýlastyrý men daýlastyrýdy emes, tatýlastyrý men eldestirýdi maqsat tutatynyna toqtaldy.
Ardaqty Paıǵambarymyzdyń (oǵan Allanyń salaýaty men sálemi bolsyn) alǵashqy kezde múshrikterge qaraǵanda kitap ıelerin jaqyn tutqanyn, keıin Rım, Mysyr, Habash patshalaryn Islamǵa shaqyryp hat joldaǵanyn atap ótti. Ardaqty Paıǵambarymyzdyń (oǵan Allanyń salaýaty men sálemi bolsyn) Mádınaǵa qonys aýdarǵan kezde jergilikti ıahýdılermen de tatý turǵanyn, osy baǵytta arnaıy «Mádına kelisimi» qabyldanǵanyn eske saldy.
QMDB Tóraǵasy sondaı-aq ózge din ókiline qysym jasaýǵa bolmaıtynyn alǵa tartyp, Paıǵambarymyzdyń musylman qoǵamynda ómir súrip jatqan ózge din ókiline zábir kórsetpeýge shaqyrǵanyn eske saldy. Sózin qortyndylaǵan Bas múftı álemdegi 57 musylman eliniń biri – bizdiń Qazaq eli táýelsizdik alǵannan beri dinaralyq jáne ultaralyq tatýlyqqa asa mán berip kele jatqanyn atap ótti.
«Bizdiń memleket – zaıyrly memleket. Sondyqtan dinı senim erkindigi men bostandyǵy zań aıasynda bekitilgen. Eshkimniń dini men tiline, ulty men násiline qol suǵylmaıdy. Endigi maqsat – birligimizdi tanytyp, bir-birimizge qoldaý kórsetý. Memleket basshysy Qasym-Jomart Toqaev halyqqa joldaǵan Joldaýynda: «Aldymyzda aýqymdy ári kúrdeli mindetter tur. Solardy tabysty júzege asyrý úshin tyń tásil, jańasha oılaý, jalpyulttyq yntymaq jáne ózara qoldaý qajet» dep atap ótken bolatyn. Musylman adam ózgelerge til tıgizip saýap tappaıdy, kerisinshe Islamnan alshaqtatqany úshin kúná tabady. Olaı bolsa, musylmannyń mindeti ózgelerdi dinnen úrkitý emes, óz dinin kemshiliksiz túrde jetkize bilý. Barshańyzdy asyl dinimizdi kórkem túrde nasıhattaýǵa shaqyramyn», - dedi Naýryzbaı qajy Taǵanuly.
Aıta keteıik, konferentsııada Nur-Múbárak ýnıversıtetiniń rektory, professor Muhammad ásh-Shahhat ál-Jındı, UǴA akademıgi, professor Ábsattar qajy Derbisáli, Reseı Islam ınstıtýtynyń rektory (Tatarstan), professor Rafık Mýhametshın, Halyqaralyq ımam Buharı ǵylymı zertteý ortalyǵynyń (Ózbekstan) dırektory Shavasıl Zııadov, Ishenaly Anarbaev atyndaǵy Qyrǵyz memlekettik ýnıversıtetiniń Tarıh jáne áleýmettik quqyqtyq bilim berý fakýltetiniń dekany, professor Nazıra Kýrbanova, Fılosofııa, saıasattaný jáne dintaný ınstıtýty Dintaný bóliminiń meńgerýshisi, professor Baqytjan Satershınov, ál-Farabı atyndaǵy QazUÝ-dyń Dintaný jáne mádenıettaný kafedrasynyń meńgerýshisi, professor Aınur Qurmanalıeva, Nur-Múbarak ýnıversıteti Ábý Hanıfa ǵylymı-zertteý ortalyǵynyń dırektory Shamshádın Kerim, basqa da ǵalymdar qatysyp, baıandama jasady.
