Bas múftı «HHI ǵasyrdyń úzdik zııatker ımamy» forýmynyń qonaǵy boldy (FOTO)
Qazaqstan musylmandary dinı basqarmasynyń Shymkent qalasyndaǵy ókildiginde «HHI ǵasyrdyń úzdik zııatker ımamy» atty forým uıymdastyryldy.
Forým jumysyna arnaıy shaqyrylǵan Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly alǵysóz alyp, barsha ımamdarǵa qazirgi zaman ımamynyń kelbeti týrasynda dárisin jetkizdi.
«Bıyl jyl basynda Tóralqada Ózimniń baǵdarlamalyq baıandamamdy jarııaladym. Sonda biz endi 7 baǵyt boıynsha jumys isteýge kóshetinimizdi aıttym. Imamdyq qyzmet úlken jaýapkershilikti qajet etedi. Paıǵambarymyz (Oǵan Allanyń salaýaty men sálemi bolsyn) «Imam – basshy ári qolastyndaǵylarǵa jaýapty» – degen. Árıne, mundaı jaýapkershilikti atqarý úshin, óz bolmysymen úlgi-ónege bolatyn, din isi men dúnıeni qatar alyp júrýge baýlıtyn kórkem minez-qulyq pen ustazdyq qabilet-qasıet, belsendilik pen azamattyq sıpattar ımamnan talap etiledi. Qazaqstan musylmandary dinı basqarmasy jyl saıyn jurtshylyqqa mańyzdy degen pátýalar men qatar qujattardy tanystyryp keledi. Bul jamaǵatqa da ımamǵa da asa qajet dúnıe. Sizder ımamnyń tulǵalyq kelbetin damyta otyryp, Ózderińiz tulǵa tárbıeleıtindeı jaǵdaıda bolý kereksizder. Árbir iste tabandylyq tanytyp, shynaıy yqylaspen istegende ǵana berekeli bolady. Ózderińizge, otbasylaryńyzǵa amandyq tileımin» - dep barsha ımamdarǵa eleýli eńbekteri úshin alǵysyn jetkizdi.
Osy forým aıasynda Apparat basshysy Ǵylymbek Jádigeruly, Aqparat jáne qoǵammen baılanys bóliminiń meńgerýshisi Marat Dálelhanuly, QMDB-nyń «Zeket jáne qaıyrymdylyq» qorynyń dırektory Talǵat Omarov óz salalaryna qatysty qajetti aqparattarmen bólisip, arnaıy baıandama jasady.
Jıyn sońynda Bas múftı Naýryzbaı qajy Taǵanuly jyl boıy jeti baǵyt boıynsha úzdik qyzmet etken birqatar ımamdarǵa alǵys hat pen qarjylaı syıaqy tabystady. Taǵy bir aıta keterligi, Ramazan aıynda belsendiligimen kózge túsken birqatar ımamdarǵa Shymkent qalasynyń ákimi M.Áıtenovtiń Alǵys haty berildi.
