Bas múftı medrese shákirtterine dáris berdi (FOTO)

Qazaqstan musylmandary dinı basqarmasynyń tóraǵasy Naýryzbaı qajy Taǵanuly Nur-Sultan qalasynda «Astana» medrese-kolledjiniń shákirtterine dáris berdi.

«Nasıhat tásilderi» taqyrybynda dáris oqyǵan Bas múftı: «Ózderińiz jaqsy bilesizder, adamǵa aıtylar nasıhattyń ýaqyty men orny bolady. Nasıhat tásiline qatysty eskeretin jaıt: halyqqa aıtar sózimizdi, ıaǵnı Islam qundylyqtaryn úreılendirip emes, súıinshilep jetkizýimiz kerek. Bul jaıynda ardaqty Paıǵambarymyz Muhammedtiń (oǵan Allanyń salaýaty men sálemi bolsyn) hadısi bar ekenin jaqsy bilesizder. Nasıhat aıtý kezinde buıryq raımen sóılemegen abzal. Óıtkeni, tyńdaýshylar arasynda jasy da, jasamysy da bolady. Nasıhat aıtqan sátte aýdıtorııanyń jas erekshelikterin de eskere júrgenderińiz jón», – dep atap ótti.

Dáris sońynda medrese-kolledj shákirtteri Bas múftımen erkin formatta suhbattasyp, suraqtaryna jaýap aldy.