Bas múftı medrese túlekterine dıplom tabystady (FOTO)
QMDB Tóraǵasy, Bas múftı Naýryzbaı qajy Taǵanuly «Astana» medrese-kolledji uıymdastyrǵan «Jolyń bolsyn, jas túlek» is-sharasyna qatysty. Medrese-kolledj qabyrǵasynan túlep ushqan shákirtter Bas múftı qolynan dıplom aldy.
Túlekterdiń oqý jylyn bitirý sharasy qasıetti Quranmen bastaldy. Alǵashqy sóz tizginin alǵan QMDB Tóraǵasy medrese ujymyn quttyqtap, jańa beleske kóterilgen shákirtterge batasyn berdi.
«Alla Taǵala qasıetti Quran aıatynda: «Bilgender men bilmegender teń be?» dep aıt», – dep buıyrady. Ilim joly – jánnatqa aparar jol. Dinimizde bilim alýdyń mańyzy zor. Sizder Allany taný, qasıetti Qurandy oqyp, jattap, Islam ilimin de meńgerdińizder. Elimizdegi árbir medrese, dinı oqý oryndary nazarymyzdan tys qalǵan emes. Qandaı oqý ornynda bilim jalǵastyramyn deseńizder, qoldaýǵa daıynbyz. Imamdyq, ustazdyq qyzmetke baratyndarǵa da jol ashyq. Alla osy jerden alǵan ilimderińizdi qaıyrly, berekeli etsin!» dedi Bas múftı.
Sondaı-aq Naýryzbaı qajy Taǵanuly oqý oryndaǵy grant sanyn 50-ge deıin jetkizý josparda bar ekenin aıtty. Sondaı-aq elorda ákimdiginiń qoldaýymen Nur-Múbarak ýnıversıtetine qosymsha 15 grant bólinetinin jetkizdi.
Túlekterge dıplom tabystaý sharasynda Bas múftı medreseden Qurandy tolyq jattaǵan Nurbergen Haıreddın men Erkinbek Musabekke Dinı basqarma atynan syı-sııapat tabystap, olardyń ata-anasyna da qurmet kórsetti. Bıyl «Astana» medrese-kolledjinen 26 shákirt túlep ushty. Onyń 8-i qyzyl dıplom ıegeri atandy.
Aıta keteıik, «Jolyń bolsyn, jas túlek» sharasyna QMDB Dinı bilim jáne kadr daıarlaý bóliminiń meńgerýshisi Smaıyl Seıtbekov, Aqparat jáne qoǵammen baılanys bóliminiń meńgerýshisi Marat Bektazınov, «Astana» medrese-kolledjiniń dırektory Baqtybaı Beısenbaev, Nur-Sultan qalasy Din isteri jónindegi basqarmasynyń basshysy Nurdáýlet Álmuhanov jáne medrese ustazdary qatysty.
