Bas múftı men oblys ákimi jańa meshittiń irgetasyn qalady (FOTO)
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Atyraý oblysyna barǵan jumys saparynda 500 oryndyq Qaıtpaı Sultan meshitiniń irgetasyn qalady. Saltanatty rásimge Atyraý oblysynyń ákimi Mahambet Dosmuhambetov qatysty.
Igi is-sharany ashqan Bas múftı Naýryzbaı qajy Taǵanuly: «Halqymyzda: «Azany bar aýyl azbaıdy», – degen naqyl bar. Meshit – barsha jaqsylyqtyń toǵysqan qutty mekeni. Bul qulshylyqtyń ǵana ordasy bolyp qalmaı, rýhanı hám mádenı-aǵartý, birlik pen berekeniń oshaǵyna aınalady degen senimdemin.
Jańa meshit, sonymen qatar, salt-dástúrimizdiń, taǵylymǵa toly tarıhymyzdyń nasıhatshysy, ári qaıyrymdylyqtyń ortalyǵy bolady.
Paıǵambarymyz Muhammed (oǵan Allanyń salaýaty men sálemi bolsyn) óziniń qasıetti hadıs-sharıfinde: «Alla Taǵala meshitti jaqsy kórgen pendeni jaqsy kóredi», – degen. Sizder meshitti jaqsy kórgendikten, Alla úıin turǵyzýǵa úles qosyp otyrsyzdar. Haq Taǵala mol saýaptan jazsyn» dedi.
Óńir basshysy Mahambet Dosmuhambetov te izgi tilegin bildirip, meshittiń qoǵamda alar ornyn aıryqsha atap ótti.
Aıta ketsek, Atyraý qalasy mańyndaǵy Erkinqala selolyq okrýginen boı kóteretin Qaıtpaı Sultan meshiti jergilikti turǵyndardyń ótinishi boıynsha salynbaq.
Qurylysy bir jylda aıaqtalatyn meshit qazaqy naqyshta salynady dep kútilýde.
500 oryndyq meshit ishinde Quran oqý bólmesi, erler jáne áıelderge arnalǵan namaz oqý zaldary, dárishanalar bolady. Meshit janynan ashana, ımam úıi salynbaq. Búginde Atyraý oblysynda 34 meshit jumys isteıdi.
