Bas múftı Mysyrda ıslam isteri jónindegi joǵary keńeste baıandama jasady (FOTO)
Qazaqstan musylmandary dinı basqarmasynyń tóraǵasy Naýryzbaı qajy Taǵanuly Mysyr Arab Respýblıkasyna jasaǵan resmı sapary kezinde Kaır qalasynda bastalǵan Islam isteri jónindegi Joǵary keńestiń 31-inshi halyqaralyq konferentsııasynda baıandama jasady.
«Dinder men mádenıetter arasyndaǵy dıalog» taqyrybynda ótip jatqan halyqaralyq konferentsııada Bas múftı Naýryzbaı qajy Taǵanuly:
«Qazaqstan men Egıpet Arab Respýblıkalary arasynda rýhanı, tarıhı, mádenı baılanystar ǵasyrdan ǵasyrǵa jalǵasyp keledi. Mysyr astanasy Kaır qalasyndaǵy Sultan áz-Zahır Beıbarys atyndaǵy meshit eki eldiń dostyq qarym-qatynasynyń rámizi ispetti. Qazaqstan jerinde kindik qany tamǵan Sultan áz-Zahır Beıbarys babamyzdyń murasy Mysyr halqy úshin tarıhı mańyzdy nysan bolyp sanalady. Bul – Mysyrdy musylman áleminiń ortalyǵyna aınaldyrǵan, Kaırdi Abbasıd halıfatynyń astanasyna deıin kótergen babamyzdyń dáýirinen mırasqa qalǵan tarıhı eskertkish. Tarıhı nysan Mysyrdyń musylman álemindegi erekshe rólin, Taıaý Shyǵystaǵy bedeli men abyroıyn asqaqtata beretinine senimdimiz», - dedi.
Bas múftı óz baıandamasynda búginde dinder men mádenıetter arasyndaǵy dıalogty nyǵaıtýdyń mańyzdylyǵyn atap ótti.
Aıta ketsek, Islam isteri jónindegi Joǵary keńestiń 31-inshi halyqaralyq konferentsııasyna 100-den astam musylman memleketteriniń múftıleri men ǵalymdary qatysýda. Konferentsııa jumysy búgin de jalǵasady.
Qazaqstandyq delegatsııa quramynda QMDB Apparat basshysy Ǵylymbek Májıev, Ýaǵyz-nasıhat bóliminiń meńgerýshisi Batyrjan Berdenuly, Dinı bilim jáne kadr daıarlaý bóliminiń meńgerýshisi Smaıyl Seıitbekov, Aqparat jáne qoǵammen baılanys bóliminiń meńgerýshisi Marat Bektazınov, Nur-Múbárak ýnıversıtetiniń prorektory Qaırat Qurmanbaev, Nur-Astana meshitiniń bas ımamy Nurlan Ramazanov bar.
