Bas múftı nasıhaty: Adam ózgege jaqsylyq jasaýmen kemeldenedi (FOTO)
Qazaqstan musylmandary dinı basqarmasynyń tóraǵasy Naýryzbaı qajy Taǵanuly Óskemen qalasynda «Halıfa Altaı» meshiti janyndaǵy Ihsan ǵylymı bilim berý ortalyǵynda jastarmen júzdesip, nasıhat aıtty.
«Jastar qaı kezde de qoǵamnyń negizgi qozǵaýshy kúshi bolǵan. Eger sizder qaıratty da qajyrly, bilimdi bolsańyzdar, bizdiń eldiń bolashaǵy da jarqyn ári kemel bolady. «Asyl tastan, aqyl jastan» degendeı, qaı qoǵamda da jastar jańarýǵa, jaqsarýǵa umtylyp, negizgi qozǵaýshy kúshke aınalǵan. Asyl dinimiz Islam da jastarǵa erekshe mańyz beredi. Mysaly, Quran Kárimde «Olar ıman keltirgen jastar edi» dep sıpattalady. Búginde bilimde adamdar ǵana óz ortasynan oza shabady. Bilimdi adamǵa Allaǵa Taǵala danalyq deıtin úlken qasıet berip qoıady.
Biz búginde jamaǵat arasynda musylmannyń ádebin nasıhattaý úshin ıhsan ilimin jan-jaqty aıtyp jatyrmyz. «Ihsan» sóziniń sharıǵattaǵy termındik maǵynasy bir nárseni qolǵa alǵanda ony «eń ádemi, eń kemel túrde jasaý» degendi bildiredi. Demek sizder bilim alý jolynda árbir tapsyrmany eń ádemi túrde oryndasańyzdar ıhsan iliminiń máni men maǵynasyn túsinesizder. Sizderge aıtarym: eń bastysy, dinge, elge qyzmet etińizder. Óıtkeni adam ózgege qyzmet etý arqyly kemeldenedi» dedi Naýryzbaı qajy Taǵanuly.
