Bas múftı Nazarbaev ortalyǵynyń tóraǵasymen kezdesti (FOTO)
Elordada QMDB Tóraǵasy, Bas múftı Naýryzbaı qajy Taǵanuly Álemdik jáne dástúrli dinder lıderleri Seziniń maqsattary men mindetterin ilgeriletý jónindegi ýákil, Konfessııaaralyq jáne órkenıetaralyq dıalogty damytý jónindegi N.Nazarbaev ortalyǵynyń Basqarma Tóraǵasy Bolat Sársenbaevpen kezdesti.
Kezdesý barysynda Bolat Sársenbaev Bas múftıge Sezdiń XIX Hatshylyǵy men jumys tobynyń daıyndyq jumysyn tanystyrdy. Sondaı-aq Naýryzbaı qajy Taǵanulyna 5-6 qazan kúnderi ótetin is-sharaǵa arnaıy shaqyrý tabystady.
«Bir dóńgelek basyna dástúrli din ókilderin jınaıtyn, el astanasy Nur-sultan qalasynda kezekti tarıhı shara oryn almaqshy. Elimiz úshin osyndaı halyqaralyq mańyzy zor sharada árqashan tatýlyqqa, beıbitshilikke úndeıtin aıaýly dinimizdiń kóshbasshysy retinde sizdiń belsene qatysýyńyz óte mańyzdy» dedi B.Sársenbaev.
Óz kezeginde Bas múftı Naýryzbaı qajy Taǵanuly mańyzdy sharaǵa shaqyrǵany úshin Bolat Sársenbaevqa alǵysyn bildire otyryp, QR Tuńǵysh Prezıdenti – Elbasy N.Nazarbaevtyń bastamasyn halyqaralyq dárejede nasıhattaýǵa, Memleket basshysy Q.Toqaevtyń eldegi birlikke bastar saıasatyna úles qosýǵa árqashan daıyn ekenin bildirdi.
Sonymen qatar, Bolat Sársenbaev Qazaqstan musylmandary dinı basqarmasynyń elimizdiń pandemııa kezinde qarapaıym adamgershilik qaǵaıdattaryn dáriptep, rýhanı birlikke shaqyryp kele jatqan eńbegin joǵary baǵalap, konfessııaaralyq baǵyttaǵy ortaq maqsattar nátıjeli bolatynyna senim bildirdi.
