BAS MÚFTI «NURSULTAN» MEShITINDE JUMA ÝAǴYZYN AITTY
Búgin Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly elordadaǵy «Nursultan» meshitinde «Sabyrdyń da san qyrly satylary bar» taqyrybynda juma ýaǵyzyn aıtty.
«Adam balasynyń ómirinde sabyrdyń orny erekshe. Sabyr – tek basyna qıyndyq túskende tózimdilik tanytyp, taǵdyrǵa moıynsuný ǵana emes, ol – adamnyń ımanyn bekemdeıtin, nápsisin tárbıeleıtin, qulshylyqta turaqtylyq tanytyp, kúnádan ózin tejeýge jeteleıtin rýhanı kemeldiktiń mańyzdy sıpaty. Alla Taǵala qasıetti Quran Kárimde:
«Eshqandaı qıyndyqqa moıymaı sabyrlylyq tanytqan jandarǵa syı-sııapattary qısapsyz beriledi», – degen («Zúmár» súresi, 10-aıat).
Imam Ǵazalı (Alla ony raqymyna alsyn): «Sabyr – dinniń rýhanı mártebeleriniń biri», – degen.
Osy turǵydan alǵanda, sabyr jaı ǵana syrtqy tózimdilik emes. Adam aldymen neniń durys, neniń burys ekenin tanyp-biledi. Sol bilim júreginde berik senimge aınalǵanda, nápsiniń qalaýyna qarsy turatyn rýhanı kúsh paıda bolady. Mine, nápsi bir nársege shaqyrǵanda, ımannyń talabyn berik ustanyp, durys joldan taımaý – sabyrdyń shynaıy kórinisi.»,- dedi Naýryzbaı qajy Taǵanuly.
Juma namazynan keıin Bas múftı meshit jamaǵatymen birge el amandyǵy men tynyshtyǵy úshin duǵa jasady.
