Bas múftı oblys ákimimen óńirdegi dinı ahýaldy talqylady (FOTO)
Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly resmı saparmen Mańǵystaý oblysyna bardy.
Jumys saparynyń josparyna sáıkes Bas múftı Naýryzbaı qajy Taǵanuly oblys ákimi Serikbaı Trumovpen kezdesip, óńirdegi dinı ahýaldy talqylady. Kezdesýge QMDB Apparat basshysy Ǵylymbek Jádigeruly, oblys bas ımamy Ánýar Izimbaıuly qatysty.
Kezdesýde oblys ákimi Serik Trumov: «Qurmetti Bas múftı! Kıeli óńir Mańǵystaýǵa qosh keldińiz. Qadamyńyz qutty, saparyńyz oń bolsyn! Ótken jyly ózińizben Erjan haziret meshitiniń irgetasyn qaladyq. Qazir meshit qurylysy qarqyndy júrip jatyr. Biz árqashan ıgi bastamalaryńyzdy qoldaımyz. Din kadrlarynyń áleýmettik jaǵdaıyna biz de kóńil bólip otyrmyz. Bul baǵytta uıymdastyrý-úılestirý jumystaryn jalǵastyra beremiz» dedi.
Bas múftı Naýryzbaı qajy Taǵanuly Serik Ótelgenulyna alǵysyn bildirip: «Biz jyl basynda jeti jumys baǵytymyzdy baǵdarlap aldyq. Sonyń biri – rýhanı tárbıe ıhsan ilimi. Óskeleń urpaqtyń tárbıesin túzep, bolashaǵyna baǵdar silteý – barshaǵa ortaq is. Biz jastardyń rýhanı tárbıesine úles qosý maqsatynda Ihsan ilimi, Kemel adam týraly kitabymyzdy ázirlep jatyrmyz. Allaǵa shúkir, ótken jyly memleket qamqorlyǵymen Dinı basqarmanyń oqý oryndaryna 1319 bilim granty bólindi. Bul – dástúrli dinı oqý-aǵartý salasy úshin úlken qoldaý. Siz de bizdiń ımamdarǵa árqashan janashyrlyq tanytyp otyrasyz. Alla razy bolsyn. Endigi maqsat – jastarǵa durys dinı maǵlumat berý. Biz muny árqashan nazarda ustaımyz» dedi.
Basqosýda taraptar aımaqtaǵy dinı ahýaldy sóz etip, destrýktıvti aǵymnyń arbaýyna ilikken azamattarǵa túsindirme jumystaryn kúsheıtýdiń mańyzdylyǵyna nazar aýdardy. Bas múftı kezdesýde ótken jyly Mańǵystaý oblysynda baspanaǵa asa muqtaj 9 otbasyǵa páter kilti jáne óńir turǵyndarynyń ıgiligi úshin 12 qudyq paıdalanýǵa berilgenin, bir jyl ishinde 20 myńǵa jýyq januıaǵa kómek kórsetilgenin atap ótti.
Aıta ketsek, búginde Mańǵystaý oblysy boıynsha 33 meshit bar. Qulshylyq úılerinde 120 ımam-ustaz qyzmet etedi. Aımaqta 5 meshittiń qurylysy júrip jatyr. Jospar boıynsha osy jyly 3 meshittiń qurylysy aıaqtalady.
