Bas múftı oblys ákimimen óńirdegi dinı ahýaldy talqylady (FOTO)
Búgin QMDB Tóraǵasy, Bas múftı Naýryzbaı qajy Taǵanuly resmı jumys saparymen Atyraý oblysyna keldi.
Sapar aıasynda Bas múftı Atyraý oblysynyń ákimi Mahambet Dosmuhambetovpen kezdesti. Kezdesý barysynda taraptar óńirdegi dinı ahýal, pandemııa kezindegi aımaqtaǵy dinı oryndardyń qyzmeti, dinı kadr daıarlaý, teris aǵymdarmen jumys máselelerin talqylady.
«Biz kúndelikti jumys barysynda óńirlerdegi dinı ahýalǵa taldaý jasaımyz. Atyraý oblysyndaǵy dinı ahýaldy jaqsarta túsý maqsatynda QMDB janynan arnaıy jumys tobyn quryp, elimizge tanymal ǵalymdardy arnaıy alyp keldim. Ǵalymdarymyz destrýktıvti dinı aǵym jeteginde ketken azamattarǵa arnaıy túsindirý jumystaryn júrgizetin bolady. Birneshe kúnge sozylatyn keshendi jumystar óz nátıjesin beredi dep senemin» dep atap ótti Naýryzbaı qajy Taǵanuly.
Kezdesý barysynda Atyraý oblysynyń ákimi Mahambet Dosmuhambetov asyl dinimizdi dáripteý, el birligin nyǵaıtý jolynda eńbek etip jatqan Qazaqstan musylmandary dinı basqarmasyna alǵysyn jetkizdi. «Barshamyzdyń atqaryp júrgen eńbegimiz ortaq. Maqsatymyz – elimizdiń birligin, amandyǵyn saqtaý, ál-aýqatyn nyǵaıtý» degen oblys ákimi dinı kadr daıarlaý máselesinde jergilikti atqarýshy bılik tarapynan qoldaý jalǵasatynyn aıtty.
Kezdesý sońynda Bas múftı men oblys ákimi dinı ońaltý, dinı aǵartý baǵytynda ortaq jobalardy júzege asyrýǵa ýaǵdalasty.
