Bas múftı on páterdi tabystaý sharasyna qatysty (FOTO)
Búgin Qaraǵandy oblystyq «Ánet baba» meshitinde qaıyrymdylyq sharasy ótip, «El úlesi – páterge» jobasy boıynsha bir sátte 10 baspananyń kilti tabystaldy.
Igi sharaǵa arnaıy qatysqan Bas múftı Naýryzbaı qajy Taǵanuly Dinı basqarmanyń negizgi jumys baǵyttarynyń biri qaıyrymdylyq, kómek surap kelgenge kómektesý ekenin atap ótti.
«Dinimizde tozańnyń salmaǵyndaı jaqsylyq jasasań da, qaıyrymyn kóresiń deıdi. Tozańnyń salmaǵyn ólshep kórdińiz be? Onyń ólshemin, onyń qaıtarymyn Alla Taǵala ǵana biledi. Bizdiń bul jerdegi shynaıy nıetimiz saqtalýy kerek. Búginge deıin «Zeket jáne qaıyrymdylyq» qorynyń uıymdastyrýymen 400-den asa páter berildi. Bul – úlken kórsetkish. Osynsha otbasyǵa qýanysh syılap, úı-jaıly bolýyna yqpal ettik. Mine, búgin osynda kelgen muqtaj otbasylar taǵy da qýanyshqa keneledi. Biz úshin odan asqan baqyt joq. Alla Taǵala barshamyzdy osyndaı shat-shadyman sátterimizden aıyrmasyn» dedi QMDB Tóraǵasy.
Búgingi baspana berý rásiminde Qaraǵandy oblysy boıynsha kópbalaly birneshe otbasy, aýyl ımamy jáne baspanaǵa muqtaj ózge ult ókili bar.
