Bas múftı Ózbekstan elshisin qabyldady (FOTO)

16 sáýіr 2021 3156 0
Оqý rejımi

Elordada QMDB Tóraǵasy, Bas múftı Naýryzbaı qajy Taǵanuly Ózbekstannyń Qazaqstandaǵy Tótenshe jáne Ókiletti Elshisi Saıdıkram Nııazhodjaevpen kezdesti. Kezdesýde taraptar Qazaqstan men Ózbekstan arasyndaǵy ózara yntymaqtastyqty nyǵaıtý, baýyrlas elder arasyndaǵy baılanystyń bekı túsýi týrasynda áńgimelesti.

Elshi Saıdıkram Nııazhodjaev tarıhı, mádenı baılanystardy jan-jaqty damytý jaıly baıandaı kele óziniń birneshe usynysyn jetkizdi.

«Qazaqstannyń Tuńǵysh Prezıdenti Nursultan Nazarbaevtyń «ULY DALANYŃ JETI QYRY» atty maqalasynda Orta ǵasyrdaǵy Otyrar qalasy álemdik órkenıettiń uly oıshyldarynyń biri  Ábý Nasyr ál-Farabıdi dúnıege ákelse, túrki halyqtarynyń rýhanı kóshbasshylarynyń biri Qoja Ahmet Iassaýı Túrkistan qalasynda ómir súrip, ilim taratqan degen sózi bar. Odan bólek tamyry tereńde jatqan Uly Jibek Jolynyń damýynda baýyrlas túbi bir túrki elderi teńdessiz oryn alady. Baǵzy zamannan kele jatqan baılanysty bekite túsý úshin Islam mádenıetiniń ortalyǵy sanalatyn Samarqan, Buhara, Tashkentke odan qaldy Túrkistan, Arystan bab, Otyrar men Syǵanaqqa ekijaqty zııarat týrlaryn uıymdastyrýdy birigip qolǵa alsaq deımin. Tarıh pen týrızmdi qatar damytý jaǵyn usynamyn», - dedi Ózbekstan Elshisi.

Al Bas múftı Naýryzbaı qajy Taǵanuly qurmetti Elshiniń taraptar arasyndaǵy baılanysqa yqylasty bolǵanyna rızashylyǵyn bildirip, koronavırýs indetiniń taralýyna baılanysty zııarat týrlarynyń ýaqytsha toqtaǵanyn aıtyp, bul eki el arasyndaǵy mádenı-Ekonomıkalyq baǵytta tıimdi ekenin jetkizdi.

«Bul óte nátıjeli joba der edim. San ǵasyrlar boıy babalarymyz shekarasyz, shekteýsiz aralasyp keldi. Túp tamyry tereńde jatqan tarıhı qatynastardy qaıta jańǵyrtý mańyzdy. Tóle bı babamyz Tashkentte, Áıteke bı Nuratada jerlengen. Mine bul da – bir tarıhı kórinis. Indettiń beti qaıtsa, ekijaqty jobalardy qolǵa alyp, zııarat týrlaryn uıymdastyrýǵa oń kózqarastamyz», - dep atap ótti Bas múftı.

Sondaı-aq kezdesýde Qazaqstan men Ózbekstan arasynda charterlik reısterdi uıymdastyrý, ımamdardyń ózara tájirıbe almasýyn qolǵa alý, jat aǵymmen birge kúresý syndy birqatar ortaq jobalar talqylandy.

Júzdesý sońynda Bas múftı Elshige kádesyı tabystap, qyzmetine bereke tiledi.

Aıta keteıik, kezdesýge QMDB Tóraǵasynyń orynbasary Ershat qajy Aǵybaıuly, Apparat basshysy Ǵylymbek Jádigeruly, Ózbekstan Respýblıkasy Elshiliginiń Birinshi hatshysy Muzaffar Ýsmanov qatysty.

 

Pіkіrler Kіrý