Bas múftı Ózbekstannyń musylman qaýymyna kóńil aıtty
Qazaqstan musylmandary dinı basqarmasynyń tóraǵasy Naýryzbaı qajy Taǵanuly Ózbekstan múftıi Ýsmonhon Temırhon ýǵlı Alımovtyń qaıtys bolýyna baılanysty marqumnyń otbasy men týǵan-týystaryna, barsha ózbek halqyna kóńil aıtty.
«Ózbekstan musylmandary dinı basqarmasynyń tóraǵasy, múftı Ýsmonhon Temırhon ýǵlı Alımov Hazirettiń qaıtys bolǵany týraly qaraly habar bizdiń de janymyzǵa qatty batty. Ózimniń jáne Qazaqstan musylman jamaǵaty atynan Ózbekstan musylmandary dinı basqarmasy ujymyna, barsha ózbek halqyna kóńil aıtamyn.
Alla Taǵala Ýsmonhon Haziretti panasyna alyp, raqymyna bólegeı. Imany salamat bolǵaı. Asyl dinimiz Islamnyń damýyna qosqan izgi isterine mol saýaptan jazyp, jánnattyń joǵary dárejesin násip etkeı.
Ýsmonhan Haziret qazaq-ózbek arasyndaǵy rýhanı baılanystyń bekýine súbeli úles qosty. Qazaqstan jáne Ózbekstan musylmandary dinı basqarmasynyń áriptestik qarym-qatynasynyń nyǵaıýyna erekshe eńbek sińirdi. Bizdiń ıgi bastamalarymyzǵa qoldaý kórsetip, jaqsy isterdiń janashyry boldy. Marqumnyń saýapty isteri Jaratýshy Jabbar Iemizdiń jarylqaýyna sebepshi bolsyn dep tileımiz. Alla Taǵala marqumnyń otbasyna, týǵan-týystaryna kórkem sabyr násip etkeı. Ámın!» delingen Bas múftıdiń kóńil aıtý jedel hatynda.
