Bas múftı «Parasat joly» jobasynyń tanystyrylymyna qatysty (FOTO)
Elordadaǵy Ulttyq akademııalyq kitaphanada «Parasat joly» jobasynyń tanystyrylymy ótti.
Jańa jobany zııaly qaýymǵa Mədenıet jəne sport mınıstri Aqtoty Raıymqulova men Sybaılas jemqorlyqqa qarsy is-qımyl agenttiginiń tóraǵasy Alık Shpekbaev tanystyrdy.
Jobanyń tanystyrylymyna QMDB Tóraǵasy, Bas múftı Naýryzbaı qajy Taǵanuly, Qazaqstan Jazýshylar odaǵy basqarmasynyń tóraǵasy Ulyqbek Esdáýlet, qalamgerler Aqushtap Baqtygereeva, Baıanǵalı Álimjanov, Kópen Ámirbek, Dáýletkereı Qápuly, Jabal Erǵalıev, basqa da zııaly qaýym qatysty.
Jıynda sóz alǵan Bas múftı «Adaldyq alańy» jobasy azamattarymyzdyń sybaılas jemqorlyqqa qarsy minez-qulyq úlgisin odan ári damytýdy kózdeıtinin aıta kelip, ortaq iske úles qosýǵa shaqyrdy.
«Islam dini – úlken ne kishili sybaılas jemqorlyq pen para berýdiń qandaı da bir túrine Quran men súnnet dáıekterine saı qatań tyıym salyp, tipti, aýyr kúnálar sanatyna da jatqyzady. Sharıǵat sheńberindegi qandaı da bir tyıymdaryn alyp qarasańyz, adam men qoǵamnyń damýyna negizdelgen. Allaǵa shynaıy qulshylyq-ǵıbadat jasap, aıtqandaryn buljytpaı oryndaýǵa tyrysqan jannyń úıinde bereke ataýlysy uıalaıdy. Ulaǵatty danyshpan babalarymyz «Az bolsa da berekesin bersin» dep bosqa aıtpaǵan. Memleket basshysy Qasym-Jomart Toqaev «Táýelsizdik bárinen qymbat» maqalasynda: «Biz ádiletti qoǵam men tıimdi memleket qurýdy kózdep otyrmyz. Kez kelgen iste ádildik qaǵıdatyn basshylyqqa alsaq, buǵan anyq qol jetkizemiz» dep jazǵan edi. Endeshe qoǵam bolyp osy iske úles qosaıyq. Alla Taǵala elimizge jaqsylyǵyn jaýdyrǵaı!», dedi Naýryzbaı qajy Taǵanuly.
Aıta keteıik, «Adaldyq alańy» jobasy aıasynda iske asatyn «Parasat joly» ortalyǵy elimizdiń barlyq óńirindegi oblystyq kitaphanalardan ashylmaq.
