Bas múftı Qabdesh Jumadilovtiń týystaryna kóńil aıtty
Qazaq rýhanııatyna ólsheýsiz úles qosqan, qarymdy qalamger, Qazaqstannyń halyq jazýshysy Qabdesh Jumadilov dúnıeden ozdy. Qaıǵyly qazaǵa baılanysty QMDB Tóraǵasy Naýryzbaı qajy Taǵanuly marqumnyń týystaryna kóńil aıtty.
«Halqymyzda «Jaqsynyń aty, ǵalymnyń haty ólmeıdi» degen sóz bar. Dańqty jazýshy bolsa da, qarapaıym ómir keshken, el-jurtqa syıly bolǵan Qabdesh Jumadilovtiń aty da, sońynan qaldyrǵan mol rýhanı murasy da ólmeıdi degen senimdemiz. Qıly kezeńde dúnıege kelip, Alash arystary ańsap ketken egemendi shaǵymyzda ómirden ótti. Onyń «Sońǵy kósh», «Baqyt jolynda», «Atameken», «Taǵdyr», «Daraboz» romandary áli kúnge oqyrmannyń kóńilinen erekshe oryn alǵan shyǵarmalar qatarynda. «Din – halyqty saqtap qalýdyń birden-bir kúshi, negizi. Dini joq adam kóringenge qul bolyp kete beredi» dep jazǵan Qabdesh Jumadilovti Alla Taǵala raqymyna alyp, týystaryna, otbasy men urpaqtaryna sabyr bersin» delingen kóńil aıtý jedelhatynda.
