Bas múftı «Qarahan» men «Tekturmas» tarıhı keshenderine zııarat jasady (FOTO)
QMDB Tóraǵasy, Bas múftı Naýryzbaı qajy Taǵanuly Jambyl oblysyna saparynda Tarazdaǵy san ǵasyrlyq tarıhy bar «Qarahan» men «Tekturmas» kesenesine arnaıy zııarat etip, babalar rýhyna Quran baǵyshtady.
Bas múftı eń aldymen XI ǵasyrdan beri saqtalǵan sáýlet óneriniń erekshe úlgisinde salynǵan Qarahan baba kesenesine bardy. Tarıhı nysanmen tanysyp, baba rýhyna taǵzym etip, Quran aıattaryn oqydy.
Keıin qala mańyndaǵy Ejelgi Taraz qalasynyń tól tarıhyn tolyǵymen beıneleıtin «Tekturmas» Etno-tarıhı keshenine keldi. Tarıhı keshen – Taraz óńirindegi ortaǵasyrlyq túrki elderiniń qasıetti mekenin kórsetetin, túrki tarıhynan syr shertetin oryn. Munda Tekturmas áýlıeden bólek, Abylaı Hannyń serigi bolǵan Mámbet batyrdyń da súıegi jatyr. Bas múftı eski qorymdaǵy babalar rýhyna Quran baǵyshtap, oblystyń bas ımamy Beıbit Álipbekulymen birge tarıhı Etno-tarıhı keshendi aralap shyqty.
Aıta keteıik, «Tekturmas» Etno-tarıhı kesheni Talas ózeniniń joǵarǵy jaǵalaýyndaǵy taýly betkeıdiń 24 gektar aýmaǵyn alyp jatyr.
