Bas múftı qasıetti úsh aıdyń bastalýymen quttyqtady
Qurmetti jamaǵat!
Barshańyzdy qasıetti úsh aıdyń bastalýymen shyn júrekten quttyqtaımyn! Otbasylaryńyzǵa baq pen bereke, birlik pen tatýlyq tileımin.
Ardaqty Paıǵambarymyz Muhammed (oǵan Allanyń salaýaty men sálemi bolsyn) qasıetti Erejep aıy kelgen kezde: «Ýa, Alla! Erejep jáne shaǵban aılarynda bizge bereke ber, bizdi Ramazan aıyna jetkize gór!» – dep duǵa jasaıtyn.
Erejep – ısi musylman qaýymy úshin erekshe aı. «Rajab» sózi ulyqtaý, qurmetteý degen uǵymdy bildiredi. Alla Taǵala zulqaǵda, zulhıjja, muharram, rajab aılarynda soǵysýǵa, qan tógýge tyıym salǵan.
Erejep – duǵa qabyl bolatyn aı. Paıǵambarymyz Muhammed (oǵan Allanyń salaýaty men sálemi bolsyn): «Bes tún bar, onda duǵalar keri qaıtarylmaıdy. Olar – Erejep aıynyń alǵashqy túni, Shaǵban aıynyń jartysyndaǵy tún, juma túni, Oraza jáne Qurban aıt túnderi», – dep súıinshi habar jetkizgen.
Qadirli qaýym!
Qasıetti aıdyń qurmeti úshin otbasyndaǵy birlik pen berekeni arttyrý nıetimen keshirim jolyn ustanyp, renjitip alǵan kisiler bolsa olarmen qaıta tatýlasaıyq. Elimiz ben jerimizdiń ıgiligi úshin duǵa jasap, aınalamyzdaǵy qamkóńil adamdarǵa qaraılasyp, Allanyń razylyǵyna jeteleıtin qulshylyqtar men izgi amaldarǵa kóńil bóleıik. Jaratqannan elimizdegi barlyq meshitte juma namazy oqylýyn tileıik. Haq Taǵala jer betinen juqpaly indetti joıyp, qalypty ómir tirshiligine qaıta oralýdy jazǵaı. Ámın!
Naýryzbaı qajy TAǴANULY,
Qazaqstan musylmandary dinı
basqarmasynyń tóraǵasy, Bas múftı
