BAS MÚFTI «QOLJAZBALYQ MURA JÁNE QAZAQ RÝHANIIaTY» HALYQARALYQ DÓŃGELEK ÚSTELINE QATYSTY
Búgin Bas múftı Naýryzbaı qajy Taǵanuly Almaty qalasyna jasaǵan issapary aıasynda Ǵylym ordasynda ótken «Qoljazbalyq mura jáne qazaq rýhanııaty» atty halyqaralyq dóńgelek ústeline qatysyp, arnaıy baıandama jasady.
Óz sózinde QMDB Tóraǵasy qazaq halqynyń jazba muralaryn zertteý men saqtaýdyń mańyzyna toqtaldy.
«Qazaq halqynyń jazba muralarynyń edáýir bóligi álemniń túrli memleketterindegi muraǵattar men kitaphanalarda saqtalsa, olardyń mańyzdy bir bóligi elimizdegi ǵylymı jáne mádenı mekemelerdiń qorlarynda jınaqtalǵan. Elimizde qoljazbalar men sırek kitaptardy saqtaıtyn birneshe ǵylymı ortalyq bar. Solardyń ishindegi eń irileriniń biri – Ǵylym ordasynyń Ortalyq ǵylymı kitaphanasy. Bul mekeme óziniń baı qoljazbalar jáne sırek kitaptar qorymen erekshelenedi.
Kóne muralar – Qazaqstannyń tarıhı-mádenı jáne rýhanı murasyn zertteýdegi mańyzdy derekkózderdiń biri. Atalǵan jádigerlerdiń basym bóligin dinı-dıdaktıkalyq, dinı-tanymdyq jáne dinı-kanondyq mazmundaǵy eńbekter quraıdy», – dedi Bas múftı Naýryzbaı qajy Taǵanuly.
Alqaly jıynǵa «Ǵylym ordasy» RMK Bas dırektory Nurlan Baqytjanuly Seıdin, QR ǴJBM ǴK M.O. Áýezov atyndaǵy Ádebıet jáne óner ınstıtýtynyń Bas dırektory, fılologııa ǵylymdarynyń doktory, akademık Kenjehan Islámjanuly Matyjanov, Nur-Múbarak Egıpet ıslam mádenıeti ýnıversıteti janyndaǵy Halyqaralyq ǵylymı zertteý jáne ınnovatsııa ortalyǵynyń dırektory, fılologııa ǵylymdarynyń doktory, professor Shámsháddın Tursynuly Kerim, Indıana ýnıversıtetiniń (AQSh) Taıaý Shyǵys, Islam jáne Ortalyq Eýrazııa zertteý ortalyǵynyń qyzmetkeri, PhD doktor Akram Habıbýlla, Q.A. Iasaýı atyndaǵy Halyqaralyq qazaq-túrik ýnıversıteti Eýrazııa ǵylymı-zertteý ınstıtýtynyń qyzmetkeri, qaýymdastyrylǵan professor Paltóre Yqtııar jáne QMDB Islam ǵylymı-zertteý ınstıtýtynyń dırektory, fılologııa ǵylymdarynyń kandıdaty, qaýymdastyrylǵan professor Tóráli Edilbaıuly Qydyr qatysty.
Dóńgelek ústel barysynda qoljazba muralaryn saqtaý, zertteý, ǵylymı aınalymǵa engizý jáne qazaq rýhanııatyn damytýdaǵy tarıhı derekkózderdiń mańyzy jan-jaqty talqylandy.
