Bas múftı «Qunanbaı qajy» meshitiniń ashylýyna qatysty (FOTO)
Shyǵys Qazaqstan oblysy Abaı aýdanynda Ulystyń uly kúnimen tuspa-tus kelgen jańa meshittiń ashylýy rásimi ótti. Igi sharaǵa Semeı óńirine arnaıy kelgen QMDB Tóraǵasy, Bas múftı Naýryzbaı qajy Taǵanuly, Abaı aýdanynyń ákimi Jarqynbek Baısabyrov jáne jergilikti aqsaqaldar qatysty.
Aýdan ortalyǵy Qaraýylda ashylǵan jańa meshit «Qunanbaı qajy» degen ataýǵa ıe boldy. Qulshylyq úıiniń ashylýynda sóz alǵan Bas múftı tálim men tárbıege negizdelgen meshittiń mánin kópshilikke jetkizip, Qunanbaı qajynyń parasat paıymyna da toqtalyp ótti.
«Biz únemi Abaıdy bıik dárejede aıtyp kelemiz. Onyń aqyl-parasat, danyshpandyq, aqyndyq qasıeti joǵary ekenin bilemiz. Abaı árkez ádildikti qalady. Biraq osy Abaıdyń bıik dárejege jetýinde Áke mektebi turǵanyn umytpaǵan jón. Búgingi abaıtanýshylar da osyny jıi aıtyp júr. Óıtkeni júz mekteptiń tárbıesine teń keletin Qunanbaıdyń qasıetin kórip ósken bala Abaı ultyna adal qyzmet etti. Qunanbaı bolys bola júrip, memlekettik qyzmetpen qatar tárbıe isine de aralasty. «Eski tam» degen jerde mektep salǵyzdy, keıin medrese, Qarqaralyda meshit saldyrdy. Mine, Allaǵa shúkir arǵy babalarymyzdyń esimin erlik kórip, nasıhattaıtyn kezge jettik. Bul Áýeli Alla, ekinshi Táýelsizdigimizdiń arqasy. Dinı basqarmanyń qurylǵanyna 30 jyl jáne bıylǵy Táýelsizdiktiń 30 jyldyǵy qarsańynda ár aımaqtaǵy meshitterimizge tarıhı tulǵalar, din janashyrlary, batyrlardyń esimin berýdi uıǵarǵan edik. Mine «Qunanbaı qajy» meshiti de búgin esigin ashty. Qutty bolsyn. Ishi jamaǵatqa tolsyn, jamaǵaty aýyzbirshilikte bolsyn», - dep aqjarma tilegin aıtyp, jańa meshitke Dinı basqarma atynan syı-sııapat tabystady.
Ashylý rásiminde sóz alǵan Abaı aýdanynyń ákimi Jarqynbek Baısabyrov qulshylyq úıiniń ashylýyna muryndyq bolǵan jergilikti demeýshi azamattarǵa aýdan halqy atynan rızashylyǵyn jetkizdi. Sondaı-aq Abaı mereıtoıy qarsańynda úles qosqan birneshe azamatty «ABAI» medalimen marapattady. Onyń ishinde arnaıy tósbelgige Bas múftı Naýryzbaı qajy Taǵanuly da ıe boldy.
Qurylysy sońǵy bir jylda qarqyn alyp, jergilikti kásipker Dýman Amantaıulynyń demeýshiligimen aıaqtalǵan. Buǵan deıin aýdan halqy osy jerdegi kóne meshitte qulshylyq jasap kelgen bolatyn. 500 adamǵa shaqtalǵan meshit janynda Bókenshi baba urpaqtary saldyrǵan hatymhana bar.
Aıta keteıik, saltanatty sharaǵa QMDB Apparat basshysy Ǵylymbek Jádigeruly, Zeket jáne qaıyrymdylyq qorynyń dırektory Talǵat Omarov qatysty.
