Bas múftı Qurban aıt qarsańynda kásipkerlerge úndeý joldady
Qadirli otandastar! Qurmetti kásipkerler!
Musylman qaýymynyń ulyq meıramy – Qurban aıtqa sanaýly kúnder qaldy. Ulyq kúnde ısi musylman balasy shynaıy nıetpen qurban shalyp, qurbandyq etin múgedekter men jetimderge, kópbalaly otbasylar men qarttarǵa taratyp, alǵysyn alýǵa tyrysady. Adamnyń alǵysyn alyp, batasyna bólený – saýapty istiń biri. Halqymyz «Alǵys alǵan arymas. Bota alǵansha bata al» deıdi emes pe?!
Qurban aıtta oryndalatyn negizgi izgi amaldyń biri – qurban shalý. Óıtkeni ardaqty Paıǵambarymyz Muhammed (oǵan Allanyń salaýaty men sálemi bolsyn): «Adam balasy qurban aıt kúni qurban shalýdan ózge amalymen Allaǵa jaqyndaǵan emes...» – deıdi. Demek Qurban aıt kúni Allaǵa unamdy ári eń súıikti amal – qurban shalý.
Aıt kúnderi halyq tarapynan mal satyp alýǵa degen suranystyń arta túsetini belgili. Osy rette elimizdegi barsha sharýa qojalyqtarynyń qojaıyndaryn ulyq meıram – Qurban aıttyń qurmetine mal qunyn sharyqtatpaı, halyqqa ońtaıly baǵany usynýǵa shaqyramyn. Sonymen qatar, barsha kásipkerlerdi turǵyndar kúnde tutynatyn áleýmettik mańyzy bar azyq-túlik baǵasyna múmkindiginshe jeńildik jasaýǵa úndeımin.
Qurban aıttyń negizgi máni musylmandar arasynda ózara meıirimdilik, jomarttyq, qaıyrymdylyq, qanaǵat syndy adamgershilik qundylyqtardy qalyptastyrý. Allanyń raqym nury tógiletin qurban aıtta jurtymyzǵa jaqsylyq jasap, kópshiliktiń rızashylyǵyna bóleneıik.
Jaratýshy Iemiz Quranda: «Ózderiń jaqsy kórgen nárseni Alla jolyna jumsamaıynsha ıgilikke jetpeısińder» («Ál-Imran» súresi, 92-aıat), – dep baıandaǵan. Saýaptar eselenip jazylatyn sátterde Alla razylyǵy úshin eldiń jaǵdaıyn eskerip, taýar baǵalaryna jeńildik jasap, ár otbasyǵa qýanysh pen merekelik kóńil kúı syılaýǵa tyrysaıyq.
Ardaqty aǵaıyn!
Súıikti Paıǵambarymyz Muhammed (oǵan Allanyń salaýaty men sálemi bolsyn) «...Kimde-kim musylman baýyrynyń qajetine jarasa, Alla Taǵala da onyń qajetin óteıdi...» degen súıinshi habar jetkizgen. Qazaqstan musylmandary dinı basqarmasy qýańshylyqtan zardap shekken óńirlerdegi sharýalarǵa qoldaý kórsetý maqsatynda «Qıyndyqta el birge» atty qaıyrymdylyq aktsııasyn bastady. Aktsııa aıasynda Qyzylorda, Mańǵystaý oblystaryna jem-shóp jóneltiletin bolady. Osy ıgi iske úles qosyp, synaqty sátterdi bastan keship otyrǵan otandastarymyzǵa qol úshyn sozýǵa shaqyramyn.
Haq Taǵala kásipterińizge bereke, ıgi isterińizge mol saýaptan jazǵaı! Ámın!
