Bas múftı Qyzylordada sáýleti erekshe meshittiń ashylýyna qatysty (FOTO)
Qyzylorda qalasynda bir mezette 1500 adam namaz oqı alatyn «Nur» meshiti ashyldy.
Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly Alla úıiniń ashylýyna qatysyp, jańa meshittiń el ıgiligine berilýimen quttyqtady. Demeýshi azamattarǵa barsha halyq atynan alǵys bildirip, ımamǵa Quran Kárim kitabyn syıǵa tartty.
«Meshit – musylman qaýymnyń Jaratýshy Iemizge kirshiksiz qulshylyq jasap, shynaıy táýbege keletin, jabyrqaǵan janyna jubanysh tabatyn, arman-tilegin Allaǵa aqtaryp, duǵa tileıtin minájat úıi. Meshit – dinı dúnıetanymyn arttyryp, rýhanı bilimin damytyp, tálim alamyn degender úshin tárbıe ordasy.
Paıǵambarymyz Muhammed (oǵan Allanyń salaýaty men sálemi bolsyn): «Kim jer betinde Allanyń úıin salýǵa atsalyssa, Alla Taǵala ol kisige jumaqtan oryn daıyndaıdy» degen. Quran Kárimde: «Alla Taǵalanyń meshitterin tek Allaǵa jáne aqyret kúnine ıman etken, namaz oqyǵan, zeketin bergen jáne Alladan basqa eshkimnen qoryqpaıtyndar ǵana salady» («Táýbá» súresi, 18-aıat) delingen. Haq Taǵala ıgi iske úles qosqan barsha azamattarǵa razy bolsyn», – dedi.
Saltanatty is-sharadan keıin Bas múftı jınalǵan jamaǵatqa ýaǵyz aıtyp, juma namazyn júrgizdi. Namazdan keıin Quran oqylyp, duǵa jasaldy.
Jańa meshitte namaz zaldarynan bólek dáris synyptary, Quran oqytý, neke qıdyrý jáne konferentsııa zaly bar. Erekshe sáýletpen salynǵan qulshylyq úıi jergilikti jamaǵat pen demeýshi azamattardyń kómegimen turǵyzyldy.
