Bas múftı Ramazanǵa baılanysty baspasóz máslıhatyn ótkizdi (FOTO)

Búgin Qazaqstan musylmandary dinı basqarmasynyń tóraǵasy Serikbaı qajy Oraz Almaty qalasynda «Interfaks-Qazaqstan» agenttiginde qasıetti ramazan aıynyń kelýine oraı baspasóz máslıhatyn ótkizdi.

Baspasóz jıynyna Bas múftıdiń bas keńesshisi, sheıh Muhammed-Huseın Alsabekov, QMDB Sharıǵat jáne pátýa bóliminiń meńgerýshisi Sansyzbaı qajy Qurbanuly, QMDB-nyń Almaty qalasy boıynsha ókil ımamy Erkinbek qajy Shoqaevtar qatysty.

Baspasóz máslıhatynda birinshi sóz alǵan Bas múftı Serikbaı qajy Oraz:

«Sizderdi kúlli musylman qaýymy asyǵa kútken qasıetti ramazan aıynyń kelýimen shyn júrekten quttyqtaımyn! Ár shańyraqqa shattyq pen baqyt, birlik pen bereke tileımin! Ramazan – jaqsylyq aıy. Orazada árbir jaqsy amaldyń saýaby eselenip jazylady. Hadıs-sharıfte aıtylǵandaı, «adam balasynyń barlyq ıgi isteriniń saýaby artady. Árbir jaqsylyqqa on eseden jeti júz esege deıin saýap jazylady». Osy rette otandastarymdy materıaldyq kómekke muqtaj jandarǵa kóńil bólip, qaıyrymdylyq is-sharalarǵa belsendi túrde atsalysýǵa shaqyramyn. Kásipkerlerdi ramazannyń qurmeti úshin azyq-túlik, kókónis pen turmystyq zattarǵa, jol-kólik aqysyna jeńildikter jasaýǵa úndeımiz. Qasıetti aıda qaraýsyz qalǵan qarttar men múgedekterge, jetimder men kópbalaly otbasylarǵa, naýqas adamdarǵa barynsha qamqorlyǵymyzdy kórseteıik, ardaqty aǵaıyn! Bir adamdy qýanyshqa bóleý – sadaqa. Qudaıy astar men sadaqalar aýyzashar ýaqytynda uıymdastyrylsa, toılar ishimdiksiz ótkizilse, jamandyqtyń bastaýy bolǵan araq-sharaptyń satylýyna barynsha jol berilmese degen tilegimdi bildiremin», – dedi.
Sheıh Muhammed-Huseın Alsabekov pen Sansyzbaı qajy Qurbanuly orazaǵa qatysty keıbir mán berer máselelerdi atap ótse, Almaty qalasynyń bas ımamy Erkinbek qajy Shoqaev qasıetti aıda shaharda atqarylar aýqymdy is-sharalar, qaıyrymdylyq aktsııalar men ıgi jobalar jaıly jýrnalısterdi habardar etti.

Kezdesý sońynda tilshiler tarapynan qoıylǵan suraqtarǵa Bas múftı jan-jaqty jaýap qatty.