Bas múftı Satybaldy Narymbetovtiń týystaryna kóńil aıtty
Qazaq kınosynyń tarlany, tańǵajaıyp kınorejısser hám kınodramatýrg Satybaldy Narymbetov dúnıeden ótti. Qaıǵyly qazaǵa baılanysty QMDB Tóraǵasy, Bas múftı Naýryzbaı qajy Taǵanuly marqumnyń týǵan-týystaryna kóńil aıtty.
«Professor, Memlekettik syılyqtyń laýreaty Satybaldy Narymbetov qazaq kınosynyń qaryshtap damýy, ult mádenıetiniń alǵa basýy úshin ter tókti. Satybaldy aǵa barlyq fılminde derlik qazaqtyń bastan keshken azapty kúnderin beıneleýge tyrysty. Sol arqyly jas urpaqty tarıhtan sabaq alýǵa shaqyrdy. «Qyzjylaǵanda» Semeı polıgonynyń tıgizgen zardabyn, «Mustafa Shoqaıda» túrki halyqtarynyń birligi úshin kúresken Mustafanyń qaıratkerlik beınesin, «Amanat» fılminde Kenesary han jaıly dıssertatsııasy úshin qýǵyn kórgen tarıhshy Ermuhan Bekmahanovtyń aýyr taǵdyryn beıneledi. Odan bólek Satybaldy Narymbetov «Balalyq shaǵymnyń Don Kıhoty», «Kúzgi buralań jol», «Aýyldan kelgen kúıeý», «Sozaqtan shyqqan Gamlet», «Jas akkordeonshynyń ómirbaıany», «Kózimniń qarasy» fılmderin Ekrandaý arqyly kórermenderge oı saldy. Ol kisige Allanyń raqymy, Paıǵambardyń shapaǵaty bolǵaı! Týǵan-týystaryna qaıǵyryp kóńil aıtamyn» delingen kóńil aıtý jedelhatynda.
Satybaldy aǵamyz suhbattarynda óziniń Narymbet moldanyń nemeresi ekenin aıtyp otyratyn. Atasy Narymbet Mekkege barǵan qajy, Sozaqtaǵy medresede dáris bergen ustaz bolǵan eken. Sodan bolar rejısser «Kez kelgen fılmdi túsirmes buryn qan aǵyzyp, Quran oqytam» deıtin. Ol kisige Allanyń panasy bolǵaı! Imany joldas bolsyn!
