Bas múftı Sheıh Allashúkir Pasha-Zademen kezdesti (FOTO)
Búgin elordada Bas múftı Naýryzbaı qajy Taǵanuly Kavkaz musylmandary basqarmasynyń tóraǵasy, Sheıh-ýl Islam Allashúkir Pasha-Zademen kezdesti.
Kezdesýde Bas múftı: «Qurmetti Sheıh-ýl Islam Allashúkir Pasha-Zade Haziret! Qazaqstanǵa qosh keldińiz. Alla saparyńyzǵa bereke násip etsin. Siz Baký qalasynda Álemdik din lıderleriniń sammıtin ótkizýge yqpal etip, osy halyqaralyq basqosýda din qaıratkerlerin ortaq maqsatqa úndep kelesiz. Qazaqstan musylmandary dinı basqarmasynyń bastamalaryn da árkez qoldap otyrasyz. Alla razy bolsyn! Osy sátti paıdalanyp, baýyrlas halyqty 18 qazan Ázirbaıjan Respýblıkasynyń táýelsizdik merekesimen shyn júrekten quttyqtaımyn. Alla Taǵala barsha baýyrlas elderge, musylman úmbetine aýyzbirshilik pen bereke násip etsin» dedi.
Sheıh-ýl Islam Allashúkir Pasha-Zade Bas múftıge izgi nıetin bildirip: «Allanyń qalaýynsyz eshkim dinı qyzmetke kelmeıdi. Sizdiń Bas múftı bolýyńyz da – Allanyń qalaýy. Sondyqtan amanaty úlken dinı qyzmetti abyroımen atqarýyńyzǵa tilektespin. Ǵajap ǵımarattaryńyz bar. Memleket jumystaryńyzǵa qoldaý kórsetip otyr eken. Endi halyq pen musylman úmbetiniń ıgiligi úshin aıanbaı eńbek etý kerek. Ol úshin eń áýeli din lıderleriniń ózara baılanysy myqty bolýy tıis. Sonda ǵana musylman úmbetiniń birligi nyǵaıady. Barsha din ókilin izgilik pen ortaq maqsatqa úndep kele jatqan Nursultan Nazarbaevtyń ıgi isine Alla jar bolyp, mol saýaptan jazsyn» dedi.
Kezdesý sońynda taraptar dinı aǵartý, dinı bilim-ǵylym salasy boıynsha yntymaqtastyqty arttyrýǵa ýaǵdalasty.
