Bas múftı temirjolshylarǵa ıhsan iliminiń mánin túsindirdi (FOTO)
Qazaqstan musylmandary dinı basqarmasynyń Tóraǵasy Naýryzbaı qajy Taǵanuly Atyraý oblysyna jasaǵan sapary kezinde «Qazaqstan temir joly» ulttyq kompanııasynyń Atyraý magıstraldyq jeli bólimshesi qyzmetkerlerine ıhsan iliminiń máni men mańyzyn túsindirdi.
«Ihsan – kez kelgen adam men ujymǵa qajet ilim. Óıtkeni ıhsannyń basy bireýdi renjitpeýmen bastalyp, sońy bireýge renjimeýmen aıaqtalady. Ihsan ilimi adam balasyn qulshylyq pen ár isti kórkem túrde oryndaýǵa, aınaladaǵy kisilermen jaqsy qarym-qatynas jasaýǵa tárbıeleıdi. Dinı basqarma ata-babamyzdan urpaqtan urpaqqa jalǵasyp kele jatqan osy ilimdi halyq arasynda keńinen nasıhattaýǵa kóńil bólýde», – dep atap ótti Naýryzbaı qajy Taǵanuly.
Kezdesýde bólimshe dırektory Elýbaı Saparov Bas múftıge alǵysyn bildirip, izgi nıetin jetkizdi. Sonymen qatar temir jol salasynyń ardager qyzmetkerleri urpaq tárbıesi jaıly pikirin ortaǵa saldy. Kezdesý sońynda Bas múftı «Ihsan – rýhanı tárbıe negizi» kitabyn syıǵa tartty.
