Bas múftı Túrki tildes elder múftıleriniń alqasyn qurýdy usyndy (FOTO)
Búgin QMDB Tóraǵasy, Bas múftı Naýryzbaı qajy Taǵanuly Túrki tildes elder din basshylarynyń Alqasyn qurýdy usyndy. Bul týraly Túrkııa Din Isteri basqarmasynyń tóraǵasy Álı Erbashpen bolǵan ekijaqty resmı kezdesýde aıtyldy.
«Qurmetti Haziret eń aldymen Sizdi Nur-Sultan qalasynda salynyp jatqan elorda bas meshitiniń ashylýyna arnaıy shaqyramyn. Túrki jurtyna ortaq dúnıe kóp. Onyń ishinde tili men dili, mádenıetimiz uqsas. Osy oraıda Túrki tildes elderdiń múftıler Alqasyn quryp, alǵashqy otyrysyn Túrki áleminiń astanasy atanǵan Túrkistan qalasynda uıymdastyrýdy usynǵaly otyrmyn. Sondaı-aq QMDB janyndaǵy Ǵulamalar keńesi men Túrkııa Din isteri basqarmasy janyndaǵy Ǵulamalar keńesiniń tájirıbe almasýyn uıymdastyrý maqsatynda Túrkııada keńes jıynyn birigip ótkizsek degen josparymyz bar» dedi Bas múftı.
Óz kezeginde Álı Erbash myrza Naýryzbaı qajy Taǵanulynyń usynysyn tolyqtaı qoldaıtynyn aıtyp, Túrki tildes elder din basshylarynyń jıynyn ótkizý, Ǵulamalar keńesi arasynda baılanys ornatý ıdeıasy qazir ózekti ekenin jetkizdi. Sondaı-aq Túrkııa múftıi Naýryzbaı qajy Taǵanulynyń Qazaqstanǵa qurmetti qonaq retinde shaqyrtýyn qabyl aldy.
Eske salaıyq, QMDB Tóraǵasynyń Túrkııaǵa resmı sapary barysynda ekijaqty memorandým jasalyp, áriptestik baılanystardy bekite túsýge ýaǵdalasqan bolatyn.
