Bas múftı Túrkistannyń rýhanı týrızmin damytýdy tapsyrdy (FOTO)
Búgin Túrkistan qalasyndaǵy oblystyq ortalyq meshitte Bas múftı Naýryzbaı qajy Taǵanulynyń tóraǵalyǵymen rýhanı týrızmdi damytýǵa arnalǵan alqaly jıyn ótti.
«Túrkistan qalasyndaǵy rýhanı týrızmdi damytýdaǵy Qazaqstan musylmandary dinı basqarmasynyń úlesi» taqyrybyna arnalǵan májiliste Bas múftı Naýryzbaı qajy Taǵanuly: «Ózderińizge belgili, kıeli Túrkistanda halqymyzdyń dini men rýhanııaty úshin qyzmet etetin Qazaqstan musylmandary dinı basqarmasynyń arnaıy ókildigi ashyldy.
Bul ortalyq Túrkistan óńiriniń odan ári rýhanı damýyna qyzmet etip, rýhanı astana mártebesiniń tereńdeı túsýine súbeli úlesin qosýda.
Respýblıkalyq Quran jarysynyń kezekti baıqaýyn osy kıeli jerde ótkizýimizdiń de ózindik máni bar. Bul bastamamyz halyqqa rýhanı kúsh beredi degen úmittemin.
Rýhanı qazynamyzdy saqtap, urpaqqa jetkizýdi kózdeıtin izgi isterimizdi Jaratqan Iemiz berekeli, nátıjeli etkeı! Alla Taǵala jańa Túrkistan oblysynyń tórinen bastaý alyp jatqan ıgi isterimiz ben nıetimizge jar bolǵaı!» dedi.
Májilis barysynda QMDB-ǵa qarasty Darhan Dala Travel týrıstik fırmasynyń dırektory Bektemir Qýandyquly kompanııanyń jumysy men jospary jaıly jáne elimizde rýhanı týrızmdi damytýdyń áleýeti týraly baıandama jasady. Sonymen qatar Túrkistan oblysy Týrızm basqarmasynyń ókili Nurdáýlet Danabaıuly da óńirde rýhanı týrızmdi damytýdyń mańyzy jaıly baıandama jasady.
Basqosýda QMDB janyndaǵy Ádep keńesiniń hatshysy Smaıyl Seıtbekov kıeli oryndardy zııarat etýdiń ádebi jaıly baıandama jasady.
Jınalys sońynda Bas múftı ımamdarǵa Túrkistanda rýhanı týrızmdi damytý jaıly naqty tapsyrmalar berdi.
