Bas múftı Túrkııa elshisimen kezdesti (FOTO)
Elordada QMDB Tóraǵasy, Bas múftı Naýryzbaı qajy Taǵanuly Túrkııa Respýblıkasynyń elimizdegi Tótenshe jáne Ókiletti Elshisi Ýfýk Ekıdjı myrzamen kezdesti.
Kezdesýge Túrkııa Elshisiniń Din isteri jónindegi keńesshisi Galıp Akyn, QMDB Tóraǵasynyń orynbasary, naıb múftı Ershat Aǵybaıuly, Apparat basshysy Ǵylymbek Jádigeruly jáne Ýaǵyz-nasıhat bóliminiń meńgerýshisi Batyrjan Mansurov qatysty.
Bas múftı kezdesý barysynda QMDB qyzmetkerleri men ımamdarynyń pandemııa kezindegi atqarǵan jumystaryn erekshe atap ótip, 25 qarasha kúni Dinı basqarmanyń qurylǵanyna 30 jyl tolýyna oraı ótetin «Beıbitshilik pen rýhanı kelisimdi saqtaýdaǵy Islam ınstıtýttarynyń róli» halyqaralyq ǵylymı-tájirıbelik onlaın-konferentsııa jóninde tilge tıek etti.
Al Túrkııa Elshisi pandemııaǵa qaramastan izgi isterdiń uıytqysyna aınalyp, halyqpen tyǵyz aralasyp, onlaın formatta da qaıyrymdylyq sharalardy júzege asyryp júrgen QMDB qyzmetkerleri men meshit ımamdaryna alǵysyn bildirdi. Odan bólek, aldaǵy kúnderi bolatyn halyqaralyq onlaın konferentsııaǵa sáttilik tilep, eki el arasyndaǵy rýhanı baılanystyń berik bolaryna tilektestigin jetkizdi.
Sondaı-aq Naýryzbaı qajy Taǵanuly «Hasekı» akademııasynda qazaq balalarynyń dinı bilim alyp, bilikti maman bolyp shyǵýlaryna múmkindik berip otyrǵan Túrkııa memleketine, Din isteri basqarmasyna jáne eki eldiń dıplomatııalyq qatynasyna uıytqy bolyp otyrǵan Tótenshe jáne Ókiletti Elshi Ýfýk Ekıdjı myrzaǵa alǵysyn bildirdi.
