Bas múftı: tyń tásil, jańa ıdeıa aıasynda jumys isteýimiz kerek (FOTO)
Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly Almatyda táýelsizdigimizdiń 30 jyldyq, Nur-Múbarak Egıpet ıslam mádenıeti ýnıversıtetiniń 20 jyldyq mereıtoıyna arnalǵan «Ulttyq rýhanı tutastyqty damytýdaǵy dinı bilim berýdiń mańyzy» atty halyqaralyq ǵylymı-tájirıbelik konferentsııaǵa qatysyp, baıandama jasady.
«Búginde ulttyq rýhanı tutastyǵymyzdy damytýda dinı bilim berýdiń mańyzy kúnnen kúnge artyp keledi. Islamdy qaralaý syndy áreketter bizdiń aramyzdaǵy áriptestik baılanysty odan saıyn kúsheıtip, rýhanı tutastyǵymyzdy damytýǵa qatysty jumystarymyzdy jandandyrý qajettigin dáleldedi. Osy rette dinı oqý oryndary arasyndaǵy ortaq kelisimdi jańartyp, áriptestik qarym-qatynasty jańa deńgeıge kóterýdi usynamyn. Sonymen qatar ǵylymı zertteý ortalyqtary arasyndaǵy ózara tájirıbe almasý is-sharalaryn ótkizý qajettigin aıryqsha atap óter edim.
Prezıdentimiz Qasym-Jomart Toqaev halyqqa joldaǵan Joldaýynda: «Aldymyzda aýqymdy ári kúrdeli mindetter tur. Solardy tabysty júzege asyrý úshin tyń tásil, jańasha oılaý, jalpyulttyq yntymaq jáne ózara qoldaý qajet» dep atap ótken bolatyn.
Rasynda din qaıratkerleriniń de qoǵam aldyndaǵy jaýapkershiligi men mindeti joǵary mánge ıe. Biz kúrdeli ári názik sala bolyp sanalatyn dinı baǵyttaǵy jumystarymyzdy tabysty júzege asyrý úshin tyń tásil, jańasha ıdeıanyń aıasynda toptasyp, birligimizdi tanytýymyz tıis. Ol úshin eń áýeli Islam álemine ortaq birlik pen ózara tatýlyq aýadaı qajet» dedi Bas múftı Naýryzbaı qajy Taǵanuly.
