Bas múftı XVI halyqaralyq onlaın forýmǵa qatysty (FOTO)
QMDB Tóraǵasy, Bas múftı Naýryzbaı qajy Taǵanuly Reseı musylmandary dinı basqarmasy men Halyqaralyq musylmandar forýmy sekretarıatynyń uıymdastyrýymen onlaın formatta ótip jatqan «Mádenıetter toǵysy: pandemııa jaǵdaıyndaǵy dinı Etıka» taqyrybyndaǵy XVI halyqaralyq forýmyna qatysty.
Sóz kezegin alǵan Bas múftı Naýryzbaı qajy Taǵanuly Qudaı qosqan kórshimiz Reseı eliniń tek strategııalyq áriptes qana emes, ǵasyrlardan beri jalǵasyp kele jatqan baýyrlas memleket ekenin atap ótti. Sondaı-aq Qazaqstan jáne Reseı musylmandary dinı basqarmalary arasyndaǵy baılanystyń nyǵaıyp kele jatqanyna toqtaldy.
«Jýyrda Nur-Sultan qalasynda Qazaqstan musylmandary dinı basqarmasynyń qurylǵanyna 30 jyl tolýyna oraı «Beıbitshilik pen rýhanı kelisimdi saqtaýdaǵy dinı ınstıtýttardyń róli» atty halyqaralyq konferentsııa ótti. Osy konferentsııada Reseı musylmandary dinı basqarmasynyń jáne Múftıler keńesiniń tóraǵasy sheıh Ravıl Gaınýtdın quttyqtaý sózin arnady.
Pandemııa kezinde de bizdiń bir mezette duǵa jasaý týraly bastamamyzdy qoldap, úndeýimizge ún qostyńyzdar. Alla Taǵala birligimizdi nyǵaıtyp, áriptestik baılanysymyzdy arttyrǵaı. Osymen 16-ret ótip jatqan musylmandardyń halyqaralyq forýmy álemdegi musylman úmbetine qatysty máseleni talqylaıtyn paıdaly ashyq alańǵa aınaldy. Forým jumysyna sáttilik tileımin» dep atap ótti QMDB Tóraǵasy.
