Bas múftı Jambyl oblysy ákimimen kezdesti (FOTO)
Jambyl oblysyna irgeli konferentsııaǵa kelgen QMDB Tóraǵasy, Bas múftı Naýryzbaı qajy Taǵanuly aımaq basshysy Berdibek Saparbaevpen arnaıy kezdesti.
Ekijaqty kezdesýde óńirdegi dinı ahýal, Táýelsizdiktiń 30 jyldyǵy qarsańynda atqarylatyn jumystar sóz boldy.
«QMDB qabyldaǵan «Jeti rýhanı qazyq» Qazaqstan musylmandarynyń rýhanı tuǵyrnamasy» – óte mańyzdy qujat. Bizge ımandylyq, otanshyldyq, bilim, adamgershilik qasıetter aýadaı qajet. «Jeti rýhanı qazyq» osy baǵyttaǵy jumysty jandandyrýǵa sep bolady. Búgingi tańda aımaqtaǵy dinı ahýal turaqty. Qordaıdaǵy Imamdar úıi óz nátıjesin berip keledi. «Tárbıeniń tal besigi» bolar Ájeler mektebin ashyldy. Aldaǵy ýaqytta ár aýdannan Atalar mektebin ashpaq oıymyz bar. Imamdardyń biliktiligi men jamaǵattyń saýatyn arttyrý jumysy toqtamaıdy» dedi Jambyl oblysynyń ákimi Berdibek Saparbaev.
Óz kezeginde Bas múftı Berdibek Mashbekulyna alǵys aıtyp, ortaq jobaǵa qoldaý kórsetip kele jatqany úshin rızashylyǵyn jetkizdi.
«Taraz shahary talaı tarıhqa kýá. Qart shahar nebir shaıqastar, Uly Jibek joly sekildi Ekonomıkalyq damýdy bastan ótkizdi. Bul qalanyń taǵy bir mańyzy – Atlah shaıqasymen baılanysty bolýynda. Osy keskilesken urystarǵa toly shaıqastyń aıaqtalyp, qazaq dalasyna Islam dininiń kelgenine 1270 jyl toldy. Osyǵan oraı úlken konferentsııa ótpek. Óńirdegi dinı ahýalǵa tikeleı aralasyp, ár bastamamyzǵa qoldaý kórsetip kelesiz. Biz Imamdar forýmynda «As berý mádenıeti», «Zırat pen zııarat mádenıeti» sekildi qujattardy qabyldadyq. As berý mádenıeti, qudaıy as berýde ysyrapqa jol bermeýdi ımamdar únemi nasıhat etip keledi. Bıyl Kemel adam, Ihsan ilimi syndy birqatar jobaǵa kóńil bólip otyrmyz» dedi Bas múftı.
Kezdesýden soń taraptar ortaq jobalardy birigip atqarýdy jalǵastyratynyn jetkizdi.
