Bas múftı jambyldyq «Ájeler mektebiniń» múshelerimen júzdesti (FOTO)
Bas múftıdiń Taraz qalasyndaǵy jumys sapary «Ájeler mektebiniń» ókilderimen kezdesýmen jalǵasty. Igi sharaǵa Jambyl oblysynyń ákimi Berdibek Saparbaev, osy óńirdiń bas ımamy Beıbit Myrzageldıev jáne aqsaqaldar qatysty.
«Óskeleń urpaqqa salt-dástúrimizben din sabaqtastyǵyn túsindiretin, jastar arasyndaǵy otbasylyq máselelerde baǵyt-baǵdar berip, ulttyq tárbıemizdi nasıhattaıtyn - «ájeler mektebi». Ol qazaq dástúrinde bolǵan. Bizdiń qazaq dástúrinde de ájeniń orny bólek. Abaıdy tárbıelegen Zere ájemiz. Al Aıǵanymdaı ájeniń tárbıesin alǵan Shoqan qazaqtyń mańdaıyna bitken jaryq juldyzy boldy. Budan ózge Birjan sal, Muhtar Áýezov syndy qazaqtyń birtýar azamattary da ájeniń tárbıesin kórip ósti. Osy óńirdiń týmasy batyr babamyz Baýyrjan Momyshuly bir sózinde: «Birinshiden, besik jyryn aıtatyn kelinderdiń azaıyp bara jatqanynan qorqamyn, ekinshiden, nemerelerine ertegi aıtyp bere almaıtyn ájelerdiń kóbeıip bara jatqanynan qorqamyn, úshinshiden, dástúrdi syılamaıtyn balalardyń ósip kele jatqanynan qorqamyn. Óıtkeni besik jyryn estip, ertegi tyńdap, dástúrdi boıyna sińirip óspegen balanyń kókirek kózi kór bola ma dep qorqamyn» - degen edi. Biraq sol bir umyt qalǵan dástúrdi qaıta jańǵyrtyp, óshkenimizdi tiriltip júrgen Sizderge myń alǵys», – dedi Naýryzbaı qajy Taǵanuly.
Júzdesýge kelgen aq jaýlyqty ájeler birneshe ulttan tursa da tatýlyqty tý etip, tárbıeniń qaınar kózinen jas urpaqty sýsyndatyp keledi.
Meshit janynan osyndaı taǵylym mektebin ashqan ımamdarǵa oblys ákimi de rızashylyǵyn bildirdi.
