Bas múftı jańa meshittiń ashylýyna qatysty (FOTO)
Búgin Qaraǵandy qalasy, Oktıabr aýdanynda jańa meshit el ıgiligine berildi. Qulshylyq úıiniń ashylýyna QMDB tóraǵasy, Bas múftı Naýryzbaı qajy Taǵanuly arnaıy qatysty.
800 adamǵa laıyqtalǵan meshitke «Tóleýtaı ata» degen ataý berildi. Túsipbekovter áýletiniń demeýshiligimen salynǵan meshittiń ashylýynda sóz alǵan Bas múftı jańa qulshylyq úıiniń ereksheligine toqtaldy.
«Bul – erekshe meshit. Dál osy aýdannyń halqy asyǵa kútti. Óıtkeni Oktıabr aýdanynda buryn-sońdy meshit bolmaǵan edi. Allanyń jerdegi úıin salyp, ony kórkeıtý taqýalardyń ǵana qolynan keledi deıdi Quranda. Mine, búgin jańa nysan jamaǵatqa esigin aıqara ashty. Meshitke atsalysqan azamattarǵa Alla razy bolsyn» - dedi Bas múftı Naýryzbaı qajy Taǵanuly.
Osy sharada Bas múftı Tóleýtaı ata meshitiniń ımamy Saılaý Jumaǵululyn kópshilikke tanystyrdy. Ol Mysyrdyń «ál-Azhar», Kaır ýnıversıtetterinde jáne Túrkııadaǵy «Hasekı» akademııasynda bilim alǵan. Meshit-medreselerde arab tili muǵalimi, Qaraǵandy qalalyq meshitinde ımamdyq qyzmetterin atqarǵan. 2017 jyldan kúni búginge deıin «Oljas Esenuly» dinı-aǵartýshylyq ortalyǵynda jemisti eńbek etti.
Aıta keteıik, Oktıabr aýdanynda 60 myńdaı halyq turady. Saıabaqta ornalasqan jańa meshittiń qujatyn demeýshiler tolyqtaı Dinı basqarmanyń enshisine ótkizdi. Qulshylyq ordasynyń qurylysy 1 jyldan asa ýaqytta aıaqtalǵan.
