Bas múftı jańa oqý jylyna arnalǵan is-sharaǵa qatysty (FOTO)
1 qyrkúıek – Bilim kúnine oraı QMDB Tóraǵasy, Bas múftı Naýryzbaı qajy Taǵanuly «Astana» medrese-kolledji uıymdastyrǵan jańa oqý jylyna arnalǵan is-sharaǵa qatysty.
Bilim kúni qarsańynda medresege arnaıy barǵan Bas múftı ustazdar men shákirtter aldynda Islam dinindegi bilim alýdyń mańyzyna toqtaldy.
«Alla Taǵala qasıetti Quran aıatynda: «Bilgender men bilmegender teń be?» dep aıt», – dep buıyrady. Ilim joly – jánnatqa aparar jol. Dinimizde bilim alýdyń mańyzy zor. Sizder Allany taný, qasıetti Qurandy oqyp, jattap, Islam ilimin de meńgerý jolyna túskeli tursyzdar. «Ǵylymsyz – bilim joq, Bilimsiz – kúniń joq» deıdi bizdiń qazaq. Qasıetti Quran Kárimde: «Alla aralaryńdaǵy ıman keltirgender men ǵylymda tereńdegenderdiń dárejesin kóteredi», – delingen. Islam sharıǵatynda er men áıelge bilim alý paryz dep kórsetilgen. Sondyqtan búgingi izdený, ilim alý jolyna túsken kúnderiń qutty bolsyn. Alla shákirtterimizdiń zeıinin ashyp, myqty ǵalym bolýyn násip etsin!» - dedi Bas múftı.
Bıylǵy jańa oqý jyly qarsańynda 48 er, 23 qyz «Astana» medrese-kolledjiniń shákirti atandy. Saltanatty rásim barysynda medrese-kolledjge qabyldanǵan shákirtter Bas múftı qolynan stýdenttik kýálik aldy.
Jańa oqý jyly qarsańynda Bas múftı Naýryzbaı qajy Taǵanuly medrese ustazdarymen de kezdesti. Medrese dırektory Baqtybaı Qydyrbaıuly jańadan kelgen 6 ustazdy tanystyrdy. Kezdesý barysynda QMDB Tóraǵasy bilim berýdegi jańashyldyq, tól dástúrimizdi nasıhattaý, Quran, aqıda men fıqhtan bólek klassıkalyq ádebıet, álemdik jańa kitaptardy da oqytýdy tapsyrdy. Sondaı-aq Bas múftı ustazdardyń biliktiligine basa mán berý, shákirtterdiń ulttyq tárbıemen sýsyndaýy, elimizde qalyptasqan dinı mektepti ary qaraı jalǵastyrý kerektigin aıtty.
Aıta keteıik, shákirtterdi qabyldaý sharasyna QMDB Apparat basshysy Ǵylymbek Jádigeruly, Dinı bilim jáne kadr daıarlaý bóliminiń meńgerýshisi Smaıyl Seıtbekov, Aqparat jáne qoǵammen baılanys bóliminiń meńgerýshisi Marat Bektazınov, «Astana» medrese-kolledjiniń dırektory Baqtybaı Beısenbaev jáne medrese ustazdary qatysty.
