Bas múftı: jazyqsyz japa shekkender rýhyna Quran baǵyshtaý – perzenttik boryshymyz (FOTO)
Búgin Qazaqstan musylmandary dinı basqarmasynyń uıymdastyrýymen Almatyda ótken Táýelsizdiktiń 30 jyldyq mereıtoıyna arnalǵan «Táýelsizdik jáne Islam» respýblıkalyq ǵylymı-tájirıbelik onlaın konferentsııasynda Bas múftı Naýryzbaı qajy Taǵanuly osylaı dedi.
«Esigimizden engen 2021 – elimiz úshin erekshe jyl. Óıtkeni, Qazaqstannyń Táýelsizdik alǵanyna 30 jyl tolady. Osy rette barshańyzdy Alla Taǵalanyń halqymyzǵa bergen teńdessiz syıy – Táýelsizdigimizdiń 30 jyldyq mereıtoıymen shyn júrekten quttyqtaımyn.
Ózderińizge belgili, Memleket basshysy Qasym-Jomart Toqaev Táýelsizdigimizdiń 30 jyldyǵyn merekeleýge daıyndyq jónindegi memlekettik komıssııanyń birinshi otyrysynda: «Táýelsizdiktiń 30 jyldyǵyn tek mereıtoı dep sanaýǵa bolmaıdy.
Eń aldymen, bul tarıhı oqıǵaǵa ıdeologııalyq turǵydan qaraýymyz kerek. 30 jyldyqqa baılanysty sharalar halyqqa rýhanı serpilis ákelýi qajet. Negizgi maqsatymyz – azamattardyń, ásirese jastardyń boıyna otanshyldyq sezimin ornyqtyrý. Rýhanııat salasyndaǵy jumystyń birneshe baǵyty bar. Ult tarıhynda óshpes iz qaldyrǵan kórnekti tulǵalardyń eńbegin nasıhattaý asa mańyzdy. Bıylǵy mereıli jylǵa birneshe ataýly data tuspa-tus kelip otyr. Jyr alyby Jambyldyń – 175, Alash arysy Álıhan Bókeıhanovtyń – 155, kúsh atasy Qajymuqannyń – 150 jyldyǵy, taǵy basqa birneshe tarıhı tulǵanyń mereıtoıy. Biz byltyr Abaı men Ál-Farabıdyń mereıtoılaryn óte maǵynaly ótkizdik. Olardyń tulǵalyq kelbeti men ómir joly, eńbekteri halyqqa úlken oı saldy. Bul tájirıbeni aldaǵy ýaqytta da ustanǵan jón» dep atap ótti.
Men osy rette táýelsizdigimizdiń 30 jyldyq mereıtoıy aıasynda eli men jeri úshin shybyn janyn qurban etken, jazyqsyz saıası qýǵyn-súrginge ushyraǵan din qaıratkerlerin de aqtaýdy usynamyn. Prezıdent aıtqandaı, «Biz jazyqsyz jazalanǵandardyń árqaısysyn este saqtaý arqyly ǵana kemel keleshekke jol ashamyz. Bolashaqtyń berik negizi Táýelsizdikten bastaý alady. Ótken ǵasyrdaǵy eń qıly kezeńniń birinde jazyqsyz japa shekkenderdiń rýhyna taǵzym etý – barshamyzdyń perzenttik boryshymyz» dedi QMDB Tóraǵasy Naýryzbaı qajy Taǵanuly.
Eske sala keteıik, juqpaly indettiń aldyn alý jáne karantındik talaptardy saqtaý maqsatynda konferentsııaǵa qonaqtar ZOOM arqyly onlaın qatysty.
