Bas múftı jeti baǵyt boıynsha bir aılyq jumystyń esebin tyńdady (FOTO)
Elordada Bas múftı Naýryzbaı qajy Taǵanulynyń tóraǵalyǵymen Qazaqstan musylmandary dinı basqarmasynyń kezekti Apparat jınalysy ótti. Kún tártibinde jeti baǵyt boıynsha aqpan aıynda atqarylǵan jumys esebi tyńdaldy.
Májiliste jeti baǵytqa jaýapty QMDB bólim meńgerýshileri baıandama jasap, esep berdi. Bólim meńgerýshileriniń esebin tyńdaǵan Bas múftı Naýryzbaı qajy Taǵanuly: «Qazaqstan musylmandary dinı basqarmasynyń ıgi is-sharalary men beınedáristeri ortalyqtan bólek aýdan, aýyl turǵyndaryna keńinen nasıhattalýy tıis. Dinmen sabaqtasqan dástúrimizdi halyqqa kóbirek nasıhattaýdy, osy baǵytta kóbirek maqala jazýdy, beıne ýaǵyzdar men dáris túsirýdi, meshitterde sanıtarlyq talaptardy eskere otyryp, arnaıy kezdesý ótkizýdi, qazaq halqynyń ulttyq oıyndaryn uıymdastyrý syndy sharalardy qolǵa alýdy tapsyramyn. Saıyp kelgende, meshitterimizdi ıhsan iliminiń, din men dástúrdiń oshaǵyna aınaldyrýymyz kerek», – dedi.
Aıta ketsek, jyl basynda Bas múftı Naýryzbaı qajy Taǵanuly din qyzmetkerlerine baǵdarlamalyq baıandamasyn joldaǵan bolatyn. Onda jeti baǵyt boıynsha jumystarǵa basymdyq beriletini aıtyldy. Olar: aqparat jáne qoǵammen baılanys, ýaǵyz-nasıhat, qaıyrymdylyq, oqý-aǵartý jáne kadrlyq áleýet, rýhanı tárbıe Ihsan ilimi, din men dástúr, jat dinı aǵymdarmen jumys.
