Bas múftı jetistikke jetýdiń 5 jolyn atap ótti (FOTO)
Búgin QMDB Tóraǵasy, Bas múftı Naýryzbaı qajy Taǵanuly Túrkistan joǵary kópsalaly qolóner kolledjinde bolyp, stýdentterge dáris oqydy.
Kolledj dırektory Aıdos Kenjehanuly Bas múftıge oqý orynnyń jumysymen, oqý baǵdarlamasy, zamanaýı aýdıtorııalarymen tanystyrdy.
Bilim ordasynyń jumysymen tanysqan Naýryzbaı qajy Taǵanuly stýdentterge jetistikke jetýdiń 5 jolyn ataı kele bylaı dedi: «Birinshiden, paıdaly ilim alý. Hadıste: «Bilim men hıkmet – múmınniń joǵaltqan qazynasy. Ony qaıdan tapsań da ıemdenip al» delingen. Ilim-bilimsiz bıikti baǵyndyrý múmkin emes. Ekinshiden, kishipeıil bolý. «Ortańa bilimiń emes, minezińmen sııasyń» deıdi Hákim Abaı. Úlkenge – qurmet, kishige izet kórsetý – ardaqty Paıǵambarymyzdyń (oǵan Allanyń salaýaty men sálemi bolsyn) súnneti, babalarymyzdan mıras bolyp qalǵan asyl qasıet.
Úshinshiden, senimdi dos tabý. «Kisini dosyna qarap tany» degen sóz bar. «Kisi dosynyń dininde» dep Paıǵambarymyz (oǵan Allanyń salaýaty men sálemi bolsyn) beker aıtpaǵan. Bul dos tańdaýdyń qanshalyq mańyzdy ekenin kórsetedi.
Tórtinshiden, jaqsy isterdiń jarshysy bolý. Keıbir kisilerdi kóremiz, óziniń sharýasy bastan asyp jatsa da, týysqanynyń nemese tanystarynyń qyzmetine zyr júgirip júredi. Bir nárse surasań «joq» dep aıta almaıtyn da baýyrlarymyz bar. Minekı, bul – óte jaqsy qasıet. Kómek berýge asyǵyp turý, jaqsylyq ataýlynyń basy-qasynan tabylý da adamdy shyńdap, abyroıyn kóteredi.
Besinshi, jaman ádetterden aýlaq bolý. Zııandy ádetterdiń eshqaısysy adamǵa jaqsylyq ákelgen emes. Sondyqtan adamdy zııanǵa ushyratatyn qandaı ádet, áreket bar, sonyń bárinen de aýlaq bolýǵa shaqyramyn».
Dáristen keıin Bas múftı kolledj dırektory Aıdos Kenjehanulyna «Ihsan – rýhanı tárbıe negizi» kitabyn syıǵa tartty.
Aıta ketsek, Túrkistan joǵary kópsalaly qolóner kolledjinde 1500-den astam stýdent oqıdy.
